उपसरपंचांचा सरपंचांवर १ कोटींच्या भ्रष्टाचाराचा गंभीर आरोप”
भंडारा जिल्ह्यातील पवनी तालुक्यातील अड्याळ ग्रामपंचायतीची पोटनिवडणूक आता चांगलीच चुरशीची बनली आहे. प्रचाराच्या अंतिम टप्प्यात गावातील राजकारणाला जोरदार उधाण आले असून आरोप-प्रत्यारोपांच्या फैरींनी वातावरण तापले आहे. उपसरपंचांनी थेट विद्यमान सरपंचांवर भ्रष्टाचाराचे गंभीर आरोप करत राजकीय वातावरण ढवळून काढले आहे.
अड्याळ ग्रामपंचायतीच्या पोटनिवडणुकीच्या पार्श्वभूमीवर उपसरपंच शंकर मानापुरे यांनी विद्यमान सरपंचांवर थेट हल्लाबोल केला आहे. गावाच्या विकासापेक्षा ठेकेदारीत अधिक रस असल्याचा आरोप करत त्यांनी सरपंचांच्या कार्यपद्धतीवर गंभीर प्रश्नचिन्ह उपस्थित केले आहे. मानापुरे यांच्या मते, अनेक विकासकामे जाणीवपूर्वक रखडवण्यात आली असून गावाच्या प्रगतीला खीळ घालण्यात आली आहे.
याचबरोबर अड्याळ गावाला नगरपंचायतीचा दर्जा मिळण्याच्या प्रस्तावालाही सरपंचांनी विरोध केल्याचा आरोप करण्यात आला आहे. या निर्णयामागे आर्थिक फायद्याची भीती असल्याचा गंभीर दावा मानापुरे यांनी केला. गावाच्या विकासाचा मार्ग मोकळा होऊ नये, यासाठीच हा विरोध करण्यात आल्याचा आरोप त्यांनी केला आहे.
वाद आणखी तीव्र करत मानापुरे यांनी सरपंच गटातील चार सदस्यांना अपात्र ठरवण्यात आल्याचा मुद्दाही उपस्थित केला. सदस्य अपात्र झाल्यानंतर सरपंचांनी जल्लोष साजरा केला आणि महिला सदस्यांबाबत आक्षेपार्ह वक्तव्य केल्याचा आरोपही त्यांनी केला. “महिलांचा सन्मान न करणारी व्यक्ती गावाचं नेतृत्व करण्यास पात्र आहे का?” असा थेट सवाल त्यांनी मतदारांसमोर उपस्थित केला.
सर्वात गंभीर आरोप म्हणजे तब्बल १ कोटी रुपयांच्या गैरव्यवहाराचा. ग्रामपंचायतीच्या निधीमध्ये मोठ्या प्रमाणात अनियमितता झाल्याचा दावा मानापुरे यांनी केला असून या आरोपामुळे निवडणुकीत नवा ट्विस्ट आला आहे. या आरोपांमुळे अड्याळमधील निवडणूक केवळ स्थानिक प्रश्नांपुरती मर्यादित न राहता प्रतिष्ठेची लढाई बनली आहे.
दरम्यान, येत्या मंगळवारी होणाऱ्या मतदानासाठी प्रशासनाने सर्व तयारी पूर्ण केली आहे. गावात शांततेत आणि पारदर्शक वातावरणात मतदान पार पाडण्यासाठी यंत्रणा सज्ज झाली आहे. मात्र आरोप-प्रत्यारोपांच्या या धुरळ्यात मतदार नेमका कोणावर विश्वास ठेवतात, याकडे सर्वांचे लक्ष लागले आहे.
अड्याळ ग्रामपंचायतीची ही पोटनिवडणूक आता केवळ उमेदवारांची लढत राहिलेली नाही, तर ती गावाच्या भविष्यासाठीची निर्णायक लढाई ठरत आहे.
आता मतदार विकासाला प्राधान्य देतात की राजकीय समीकरणांना, हे निकालात स्पष्ट होणार आहे.
