“पुरोगामी महाराष्ट्राला अंधश्रद्धेची काळी छाया; निंबा गावात ‘भोंदू महाराजां’चा धक्कादायक प्रकार उघड”
अकोला जिल्ह्यातील मुर्तीजापुर तालुक्यातील निंबा गावातून अंधश्रद्धेचा धक्कादायक प्रकार समोर आला आहे. पुरोगामी विचारांच्या महाराष्ट्रात आजही अंधश्रद्धेच्या नावाखाली अमानुष कृत्ये सुरू असल्याचे या घटनेतून उघड झाले आहे. चेतन मुळे उर्फ ‘गुलाल शेष महाराज’ नावाचा भोंदू बाबा उपचाराच्या नावाखाली लहान मुलांवर अत्याचार करत असल्याचे आरोप होत आहेत.
अवघ्या हजार लोकसंख्येच्या या गावात चार भोंदू महाराजांचे दरबार भरत असल्याची माहिती समोर आली आहे. त्यामध्ये ‘गुलाल शेष महाराज’ यांचा दरबार सर्वाधिक चर्चेत असून, येथे लहान मुलांना दातांनी उचलणे, खिळ्यांच्या आसनावर बसवणे यांसारखे अंगावर काटा आणणारे प्रकार केल्याचा आरोप आहे.
घटनास्थळी भेट दिल्यानंतर संबंधित बाबा घरी नसल्याचे सांगत कुटुंबीयांनी कोणतीही प्रतिक्रिया देण्यास नकार दिला. मात्र, स्थानिक ग्रामस्थांनीच या प्रकारांचा पर्दाफाश करत हे सर्व अंधश्रद्धा आणि फसवणूक असल्याचे स्पष्ट केले आहे.
दरम्यान, अखिल भारतीय अंधश्रद्धा निर्मूलन समितीने या प्रकरणाची गंभीर दखल घेत दोषींवर कठोर कारवाईची मागणी केली आहे. या पार्श्वभूमीवर मुर्तीजापुर पोलिसांनीही हालचाली सुरू केल्या असून संबंधित भोंदू बाबांना नोटिसा बजावत समज देण्याची प्रक्रिया सुरू आहे.
एकीकडे विज्ञान, प्रगती आणि समतेची मूल्ये सांगणारा महाराष्ट्र, तर दुसरीकडे अंधश्रद्धेच्या नावाखाली सुरू असलेले अमानुष प्रकार—हा विरोधाभास चिंताजनक आहे. अशा घटनांना आळा घालण्यासाठी समाज आणि प्रशासन या दोघांनीही अधिक सजग आणि सक्रिय होण्याची गरज व्यक्त केली जात आहे.
