“नागपूरमध्ये कोट्यवधींची जमीन फसवणूक उघड; बनावट कागदपत्रांवर १० कोटींचा व्यवहार”
नागपूर शहरात जमीन व्यवहाराच्या नावाखाली कोट्यवधी रुपयांची फसवणूक झाल्याचा धक्कादायक प्रकार समोर आला आहे. बनावट कागदपत्रांच्या आधारे एका महिलेने तब्बल १० कोटी रुपयांहून अधिक रक्कम उकळल्याचा आरोप असून, या प्रकरणी कोतवाली पोलीस ठाण्यात गुन्हा दाखल करण्यात आला आहे.
माहितीनुसार, अजनी परिसरात राहणारी आरोपी खैरून्निसा मोहम्मद समद हिने मौजा बेसा येथील खसरा क्रमांक ९३२४, ९३/४ आणि ९३/५ या जमिनींवर कोणतेही कायदेशीर वारस नसतानाही बनावट कागदपत्रे तयार केली. पती मोहम्मद समद मोहम्मद ईसाक यांच्या मृत्यूनंतर या जमिनीवर हक्क असल्याचे भासवून आरोपीने नियोजनबद्ध कट रचल्याचा आरोप आहे.
यानंतर कोतवाली हद्दीतील सदोदय कॉम्प्लेक्स, दारोडकर चौक येथे फिर्यादीला जमीन दाखवून विश्वासात घेत विक्रीचा करार करण्यात आला. ३१ ऑगस्ट २०२२ रोजी करार आणि इतर कारणांखाली आरोपीने फिर्यादीकडून तब्बल १० कोटी २ लाख ११ हजार रुपये स्वीकारले. मात्र, नंतर ही कागदपत्रे बनावट असल्याचे उघड झाले.
फिर्यादीच्या तक्रारीवरून कोतवाली पोलिसांनी आरोपीविरुद्ध भारतीय दंड संहितेच्या कलम ४०६, ४२०, ४६५, ४६८ आणि ४७१ अंतर्गत गुन्हा दाखल केला असून पुढील तपास पोलीस उपनिरीक्षक खुशाल राठोड करत आहेत.
जमिनीच्या व्यवहारात वाढत्या फसवणुकीच्या पार्श्वभूमीवर नागरिकांनी अधिक सतर्क राहण्याची गरज अधोरेखित झाली आहे. या प्रकरणात पुढे आणखी कोणते खुलासे होतात, याकडे सर्वांचे लक्ष लागले आहे.
