नशाविरोधात पोलिसांची मोठी कारवाई; ड्रग तस्करांच्या घरांवर ‘पिवळा पंजा’
जम्मू : जम्मू-काश्मीर केंद्रशासित प्रदेशात वाढत्या नशा व्यवसायावर आळा घालण्यासाठी पोलिसांनी मोठी कारवाई सुरू केली आहे. ड्रग तस्करांविरोधात कडक पावले उचलत त्यांच्या मालमत्तांवर थेट कारवाई करण्यात येत आहे.
मिळालेल्या माहितीनुसार, जम्मू-काश्मीरचे उपराज्यपाल मनोज सिन्हा यांनी “नशा मुक्त जम्मू-काश्मीर” या १०० दिवसांच्या विशेष मोहिमेला सुरुवात केली आहे. या मोहिमेअंतर्गत पोलिसांनी नशा तस्करांविरोधात आक्रमक कारवाई सुरू केली आहे.
आज सकाळी जम्मू जिल्ह्यातील नरवाल परिसरातील राजीव नगर येथे पोलिसांनी मोठी कारवाई केली. नशा विक्रीतून उभारण्यात आलेल्या तस्करांच्या घरांवर जेसीबी (पिवळा पंजा) यंत्राद्वारे तोडफोड करण्यात आली. या कारवाईदरम्यान कोणताही अनुचित प्रकार घडू नये यासाठी परिसरात मोठा पोलीस बंदोबस्त तैनात करण्यात आला होता.
नशा तस्करांविरोधातील ही मोहीम अधिक तीव्र करण्यात येणार असल्याचे पोलिसांकडून संकेत देण्यात आले असून, बेकायदेशीर मार्गाने उभारलेल्या मालमत्तांवर अशाच प्रकारे कारवाई सुरू राहणार असल्याचे सांगण्यात येत आहे.
