‘हर हर महादेव’च्या जयघोषात केदारनाथ धामाचे दरवाजे खुले; मुख्यमंत्र्यांनी केली पूजा
उत्तराखंडमधील प्रसिद्ध केदारनाथ धामाचे दरवाजे बुधवारी सकाळी भाविकांसाठी खुले करण्यात आले. वैदिक मंत्रोच्चार, पारंपरिक विधी आणि ‘हर हर महादेव’च्या जयघोषात सकाळी ८ वाजता मंदिराचे कपाट उघडण्यात आले.
केदारनाथ धामात या ऐतिहासिक क्षणाचे साक्षीदार होण्यासाठी हजारो भाविकांनी मोठी गर्दी केली होती. मंदिर परिसराला तब्बल १५ क्विंटल फुलांनी आकर्षक सजावट करण्यात आली होती. रंगीबेरंगी फुलांनी सजलेल्या या हिमालयीन धामाचे दृश्य अत्यंत भक्तिमय आणि मनमोहक दिसत होते.
मंदिराचे दरवाजे उघडण्यापूर्वी पारंपरिक धार्मिक विधी पार पडले. त्यानंतर उत्तराखंडचे मुख्यमंत्री पुष्कर सिंह धामी यांनी मंदिरात जाऊन भगवान केदारनाथांचे दर्शन घेत पूजा-अर्चना केली. राज्यातील सुख-समृद्धी आणि देशाच्या कल्याणासाठी त्यांनी प्रार्थना केली.
दरवाजे खुले होताच भाविकांनी ‘हर हर महादेव’च्या घोषणांनी संपूर्ण परिसर दुमदुमून टाकला. यंदाच्या यात्रेसाठी प्रशासनाकडून विशेष तयारी करण्यात आली असून, सुरक्षा, आरोग्य सुविधा आणि वाहतूक व्यवस्थेची काटेकोर व्यवस्था करण्यात आली आहे.
हिवाळ्यात बर्फवृष्टीमुळे काही महिन्यांसाठी बंद असलेले केदारनाथ धाम पुन्हा खुले झाल्याने भाविकांमध्ये मोठा उत्साह पाहायला मिळत आहे.
