विरुधुनगरजवळ फटाक्यांच्या कारखान्यात भीषण स्फोट; २३ कामगारांचा मृत्यू, अनेक जखमी
तामिळनाडूमधील विरुधुनगर जिल्ह्यात रविवारी फटाक्यांच्या कारखान्यात झालेल्या भीषण स्फोटाने संपूर्ण राज्य हादरले आहे. कत्तनारपट्टी येथील वनजा फायरवर्क्स युनिटमध्ये झालेल्या या दुर्घटनेत २३ कामगारांचा मृत्यू झाला असून, अनेक जण गंभीर जखमी झाले आहेत.
रविवारी सकाळी हा स्फोट झाला. स्फोट इतका भीषण होता की, कारखान्यातील अनेक शेड्स कोसळल्या. काही कामगार ढिगाऱ्याखाली दबले गेले, तर अनेकांचे मृतदेह स्फोटाच्या तडाख्याने दूर फेकले गेले. बहुतांश मृतदेह इतके जळाले होते की त्यांची ओळख पटवणेही कठीण झाले आहे.
घटनास्थळी पोहोचलेल्या अग्निशमन दलाच्या जवानांनी आणि बचाव पथकांनी मोठ्या प्रयत्नांनंतर ढिगाऱ्यातून मृतदेह बाहेर काढले. परिसरात सर्वत्र शरीराचे अवशेष विखुरलेले दिसत होते. या भीषण दृश्यामुळे घटनास्थळी उपस्थित असलेल्या लोकांमध्ये भीतीचे वातावरण निर्माण झाले.
पहिल्या स्फोटानंतर काही वेळातच दुसरा स्फोट झाला. या दुसऱ्या स्फोटात १७ जण जखमी झाले असून, त्यामध्ये सहा पोलीस कर्मचारी आणि चार अग्निशमन दलाचे जवान यांचाही समावेश आहे. सुदैवाने बचावकार्यात गुंतलेले काही पत्रकार आणि अन्य कर्मचारी थोडक्यात बचावले.
धक्कादायक बाब म्हणजे, रविवारी फटाके उद्योग बंद असतानाही हा कारखाना सुरू होता. जिल्हाधिकारी एन. ओ. सुखपुत्रा यांनी सांगितले की, या युनिटला रविवारी काम करण्याची परवानगी नव्हती. परवानगीशिवाय कारखाना सुरू ठेवण्यात आल्याने ही दुर्घटना घडल्याचा प्राथमिक अंदाज व्यक्त करण्यात येत आहे.
या घटनेनंतर प्रशासनाने संपूर्ण परिसर सील केला असून, स्फोटाचे नेमके कारण शोधण्यासाठी चौकशी सुरू करण्यात आली आहे. कारखाना मालक आणि संबंधित अधिकाऱ्यांविरोधात कठोर कारवाई होण्याची शक्यता व्यक्त केली जात आहे.
तामिळनाडूमधील फटाके उद्योगात गेल्या काही वर्षांतील ही सर्वात भीषण दुर्घटनांपैकी एक मानली जात आहे.
