मेहकरमध्ये खड्ड्यात बसून आंदोलन; रस्ता रोकोमुळे तासभर वाहतूक ठप्प
बुलढाणा जिल्ह्यातील मेहकर शहरात रस्त्यांच्या दुरवस्थेविरोधात नागरिकांचा संताप अखेर रस्त्यावर उतरला. बसस्थानकाकडे जाणाऱ्या मुख्य मार्गावरील खड्ड्यांमुळे हैराण झालेल्या आंदोलनकर्त्यांनी प्रशासनाचे लक्ष वेधण्यासाठी अनोखी पद्धत अवलंबली. चक्क रस्त्याच्या खड्ड्यात बसून आंदोलन करण्यात आले. या आंदोलनामुळे तब्बल एक तास वाहतूक ठप्प झाली.
मेहकर शहरातील बसस्थानकाकडे जाणारा मुख्य रस्ता सध्या अत्यंत खराब अवस्थेत आहे. रस्त्यावर ठिकठिकाणी मोठमोठे खड्डे पडले असून संपूर्ण रस्ता उखडलेला आहे. यामुळे वाहनचालक आणि नागरिकांना रोजच मोठ्या त्रासाला सामोरे जावे लागत आहे.
याच पार्श्वभूमीवर यशवंत सेनेचे बुलढाणा संपर्कप्रमुख गजानन बोरकर यांनी थेट रस्त्याच्या मधोमध असलेल्या मोठ्या खड्ड्यात बसून ‘रस्ता रोको’ आंदोलन छेडले. त्यांच्या या आंदोलनाला स्थानिक नागरिकांचाही पाठिंबा मिळाला. आंदोलनादरम्यान “रस्ता दुरुस्त करा”, “खड्डेमुक्त मेहकर करा” अशा घोषणाही देण्यात आल्या.
या आंदोलनामुळे काही काळासाठी संपूर्ण वाहतूक विस्कळीत झाली. मुख्य रस्त्यावर वाहनांच्या लांबच लांब रांगा लागल्या आणि तब्बल एक तास ट्रॅफिक जाम निर्माण झाला. अनेक वाहनचालकांना मोठ्या गैरसोयीचा सामना करावा लागला.
आंदोलनकर्त्यांचा आरोप आहे की, या रस्त्यावरील खड्ड्यांमुळे अपघातांचे प्रमाण वाढले आहे. यापूर्वीही या मार्गावर अनेक छोटे-मोठे अपघात झाले असून, नागरिकांचा जीव धोक्यात आला आहे. वारंवार तक्रारी करूनही प्रशासनाकडून कोणतीही ठोस कारवाई करण्यात आलेली नाही, असा आरोप त्यांनी केला.
आंदोलनकर्त्यांनी प्रशासनाला इशारा दिला आहे की, रस्त्याची तात्काळ दुरुस्ती करण्यात आली नाही, तर यापेक्षाही तीव्र आंदोलन छेडले जाईल.
या आंदोलनानंतर तरी प्रशासन जागे होणार का, आणि मेहकरमधील नागरिकांना खड्डेमुक्त रस्ता कधी मिळणार, याकडे आता सर्वांचे लक्ष लागले आहे.
