प्रीमियम पेट्रोल ₹160 प्रति लिटर; जेट इंधन दरात 8.5% वाढ
नवी दिल्ली – देशात प्रीमियम पेट्रोल आणि डिझेलच्या किमतीत वाढ करण्यात आली असून, प्रीमियम पेट्रोलचा दर आता ₹160 प्रति लिटरपर्यंत पोहोचला आहे. इंडियन ऑइल कॉर्पोरेशन लिमिटेडने (IOC) दिल्लीमध्ये हे दर वाढवले आहेत.
माहितीनुसार, XP100 प्रीमियम पेट्रोलचा दर ₹149 वरून वाढून ₹160 प्रति लिटर झाला आहे. तसेच, एक्स्ट्रा ग्रीन प्रीमियम डिझेलचा दर ₹91.49 वरून ₹92.99 प्रति लिटर करण्यात आला आहे. XP100 हे 100-ऑक्टेन पेट्रोल असून, उच्च क्षमतेच्या गाड्या आणि सुपरबाईकसाठी वापरले जाते.
दरम्यान, त्याच दिवशी एव्हिएशन टर्बाइन फ्युएल (ATF) म्हणजेच जेट इंधनाच्या किमतीतही सुमारे 8.5 टक्क्यांची वाढ करण्यात आली होती. मात्र, देशांतर्गत विमान कंपन्यांवरील भार कमी करण्यासाठी सरकारने हस्तक्षेप करत काही प्रमाणात दरवाढ कमी केली.
गेल्या महिन्यात व्यावसायिक LPG सिलिंडरच्या किमतीतही मोठी वाढ झाली आहे, ज्यामुळे महागाईचा दबाव वाढण्याची शक्यता आहे.
दरवाढीमागे कोणतेही अधिकृत कारण IOC कडून देण्यात आलेले नसले तरी, मध्यपूर्वेतील संघर्ष आणि जागतिक पातळीवरील इंधन पुरवठ्यातील अडचणीमुळे तेलाच्या किमतीत वाढ झाल्याचे मानले जात आहे.
यापूर्वी, २७ मार्च रोजी केंद्र सरकारने नियमित पेट्रोल आणि डिझेलवरील उत्पादन शुल्कात प्रति लिटर ₹10 कपात केली होती. त्यामुळे जागतिक दरवाढ असूनही सामान्य इंधनाच्या किमती स्थिर ठेवण्यास मदत झाली आहे.
