अमरावतीत मालमत्ता कर थकबाकीदारांवर महापालिकेची धडक कारवाई; ₹९.३१ लाखांची वसुली

अमरावती (प्रतिनिधी):
अमरावती महानगरपालिकेकडून मालमत्ता कर थकबाकीदारांविरोधात शहरभर धडक मोहीम राबविण्यात येत असून, विविध झोनमध्ये मालमत्ता जप्त व सील करण्याची कारवाई सुरू आहे. या कारवाईदरम्यान झोन क्रमांक ५ मध्ये तब्बल ₹९.३१ लाखांची थकबाकी वसूल करण्यात यश आले आहे.

मिळालेल्या माहितीनुसार, २४ मार्च २०२६ रोजी झोन क्रमांक ५ अंतर्गत वार्ड E-4 मधील एका मालमत्तेवर ₹९,३१,७३९ इतकी थकबाकी असल्याने ती मालमत्ता सील करण्यात आली होती. त्यानंतर संबंधित मालकाने पूर्ण थकबाकी भरल्यानंतर मालमत्ता मुक्त करण्यात आली.

दरम्यान, झोन क्रमांक १ अंतर्गत वलगाव रोड, नवसारी परिसरात मोहम्मद शकील यांच्या मालमत्तेवर ₹१,९३,८१३ थकबाकीमुळे जप्ती आणि सीलिंगची कारवाई करण्यात आली. तसेच सहायक आयुक्त नंदकिशोर तिखिले यांच्या आदेशानुसार विलासनगरातील एका दुकानावरही थकबाकीमुळे कारवाई करण्यात आली आहे.

बडनेरा झोन क्रमांक ४ मध्ये सातुर्णा आणि भिवापूरकर लेआउट परिसरातील अनेक मालमत्तांवर सीलिंगची कारवाई करण्यात आली असून काही थकबाकीदारांनी अंशतः रक्कम भरून सहकार्य दर्शवले आहे. तर राजापेठ झोन क्रमांक २ मध्ये के.के. ट्रेडिंग कंपनी आणि राका कन्स्ट्रक्शन या व्यावसायिक मालमत्तांवर लाखोंची थकबाकी असल्याने त्यांनाही सील करण्यात आले आहे.

महानगरपालिकेच्या अधिकाऱ्यांनी स्पष्ट केले आहे की, शहराच्या विकासासाठी मालमत्ता कर हा महत्त्वाचा महसूल स्रोत असून, कर न भरणाऱ्यांवर कोणतीही तडजोड केली जाणार नाही. या कारवाईमुळे थकबाकीदारांमध्ये खळबळ उडाली असून अनेक नागरिक आता थकबाकी भरण्यास पुढे येत आहेत.

महानगरपालिकेची ही मोहीम पुढील काळातही सुरू राहणार असून नागरिकांनी वेळेत कर भरून कारवाई टाळावी, असे आवाहन प्रशासनाकडून करण्यात आले आहे.