नागपूरात किरकोळ वादातून धक्कादायक प्रकार; मारहाणीनंतर महिलेशी गैरवर्तनाचा आरोप
नागपूर :
शहरातील यशोधरा नगर परिसरात किरकोळ वादाने गंभीर वळण घेतल्याची धक्कादायक घटना समोर आली आहे. रस्त्यात गाडी अडवून मारहाण केल्यानंतर महिलेसोबत अश्लील वर्तन केल्याचा आरोप करण्यात आला असून या घटनेमुळे परिसरात संतापाची लाट उसळली आहे.
यशोधरा नगर पोलीस ठाण्याच्या हद्दीतील राजीव गांधी नगर परिसरात ही घटना घडली. मिळालेल्या माहितीनुसार, फिर्यादी शेख सत्तार (वय ३९), व्यवसायाने ओला चालक, आपल्या कुटुंबासह कारने पारडीकडे जात असताना आरोपी शेख समीर उर्फ शेरा याने मोटारसायकल आडवी लावून त्यांचा रस्ता अडवला.
यानंतर आरोपीने शिवीगाळ करत शेख सत्तार यांच्यावर हल्ला चढवला. या मारहाणीत त्यांच्या चेहऱ्यावर आणि नाकावर गंभीर दुखापत झाली. त्यानंतर पीडित व्यक्ती तक्रार देण्यासाठी पोलीस ठाण्यात गेल्यानंतर आरोपी त्यांच्या घरी पोहोचल्याचे समोर आले.
तेथे आरोपीने पीडिताच्या भावाच्या पत्नीसोबत अश्लील शिवीगाळ करत गैरवर्तन केल्याचा आरोप आहे. तसेच कपडे काढण्याचा प्रयत्न करत अभद्र हावभाव केल्याचीही माहिती समोर आली आहे.
स्थानिक नागरिकांच्या माहितीनुसार, दोन्ही कुटुंबांमध्ये याआधीही वाद झाले होते आणि आरोपी वारंवार भांडण घालत असल्याचे सांगितले जात आहे. दरम्यान, यशोधरा नगर पोलिसांनी या प्रकरणी गुन्हा दाखल केला असून आरोपीच्या अटकेसाठी शोधमोहीम सुरू आहे.
किरकोळ वादातून इतक्या गंभीर प्रकाराला तोंड फुटणे ही चिंताजनक बाब असून आरोपीला तातडीने अटक करून कडक कारवाई करावी, अशी मागणी नागरिकांकडून केली जात आहे.
