अमरावती मनपाच्या बजेटवर सखोल चर्चा; नागरिकाभिमुख विकासावर भर
अमरावती महानगरपालिकेच्या सन २०२६-२७ च्या अर्थसंकल्पावर चर्चा करण्यासाठी अमरावती महानगरपालिका ची स्थायी समिती बैठक पार पडली. ही बैठक स्व. सुदामकाका देशमुख सभागृहात आयोजित करण्यात आली होती.
बैठकीच्या अध्यक्षस्थानी स्थायी समितीचे सभापती अविनाश मार्डीकर होते. यावेळी आगामी आर्थिक वर्षासाठी प्रस्तावित बजेटमधील विविध तरतुदींवर सविस्तर चर्चा करण्यात आली.
सभापती मार्डीकर यांनी बजेटमधील प्रत्येक मुद्द्याचा बारकाईने आढावा घेत तो अधिक नागरिकाभिमुख करण्याचे आवाहन केले. बैठकीत नगरसेवक आणि अधिकाऱ्यांनी शहराच्या विकासासाठी महत्त्वपूर्ण सूचना मांडल्या.
विशेषतः स्वच्छता व्यवस्था सुधारणा, रस्ते व पायाभूत सुविधा, महानगरपालिका शाळा आणि आरोग्य केंद्रांसाठी निधी वाढवण्यावर भर देण्यात आला. तसेच सार्वजनिक वाहतूक व्यवस्थेच्या सुधारणेसाठीही प्रस्ताव मांडण्यात आले.
बैठकीत प्राप्त सूचनांच्या आधारे संबंधित अधिकारी अर्थसंकल्पात आवश्यक सुधारणा करणार असून, सुधारित बजेट पुढील आमसभेत मंजुरीसाठी सादर करण्यात येणार आहे.
या प्रक्रियेमुळे अर्थसंकल्प अधिक पारदर्शक आणि कार्यक्षम होईल, असा विश्वास समिती सदस्यांनी व्यक्त केला आहे.
अमरावती मनपाच्या या बैठकीतून शहर विकासासाठी महत्त्वाचे निर्णय होण्याची शक्यता असून, सुधारित बजेटमध्ये नागरिकांच्या अपेक्षा कितपत पूर्ण होतात, याकडे आता सर्वांचे लक्ष लागले आहे.
