दर्यापूर नगरपालिका निवडणूक : नगराध्यक्षपदासाठी तिरंगी लढत, भाजप–काँग्रेस–शिवसेना शिंदे गट आमने-सामने

दर्यापूर : नगरपालिका निवडणुकांसाठी आज नामांकन प्रक्रियेला मोठी गती मिळाली असून नगराध्यक्ष पदासाठी तीन प्रमुख पक्षांच्या उमेदवारांनी अर्ज दाखल केल्याने तिरंगी लढतीचे स्पष्ट संकेत मिळत आहेत. भाजप, काँग्रेस आणि शिवसेना (एकनाथ शिंदे गट) या तिन्ही पक्षांनी अधिकृत उमेदवार मैदानात उतरवले आहेत.

भाजप, काँग्रेस आणि शिवसेनेचे उमेदवार रिंगणात
– भाजप : नलिनी प्रकाश भारसाकडे
– काँग्रेस : मंदाकिनी सुधाकर भारसाकडे
– शिवसेना (शिंदे गट) : प्रदीप मलीये

तीघांनीही मोठ्या समर्थकांच्या उपस्थितीत आपले नामांकन दाखल केले. यामुळे शहरातील राजकीय वातावरण उत्साहात आणि चर्चांनी गजबजले आहे.

नामांकनाच्या निर्गमनाने निवडणुकीला वेग
भाजप उमेदवार नलिनी प्रकाश भारसाकडे यांनी पक्षातील पदाधिकारी आणि कार्यकर्त्यांसह अर्ज दाखल केला. काँग्रेसच्या मंदाकिनी भारसाकडे यांनीही मोठ्या समर्थकांच्या उपस्थितीत नामांकन सादर केले असून काँग्रेसने या निवडणुकीत महिला नेतृत्वाला प्राधान्य दिल्याचे बोलले जात आहे. तर शिवसेना शिंदे गटाचे प्रदीप मलीये यांच्या अर्ज दाखल प्रक्रियेदरम्यान घोषणाबाजीने वातावरण दुमदुमले.

तिरंगी लढतीकडे मतदारांचे लक्ष
तिन्ही पक्षांच्या उमेदवारांनी रिंगणात उतरल्याने दर्यापूर नगराध्यक्ष पदाची निवडणूक अतिशय चुरशीची होणार आहे. मतदारांचा कल कोणत्या पक्षाकडे झुकतो आणि शेवटी कोण विजयी ठरतो, याकडे आता सर्वांचे लक्ष लागले आहे.