बेलपुरा परिसरात चाकूसह तडीपार आरोपी ताब्यात

गुन्हे शाखेची धडक कारवाई; घातक चाकू जप्त, राजापेठ पोलिसांत गुन्हा दाखल

अमरावती | प्रतिनिधी

अमरावती शहरात सार्वजनिक ठिकाणी चाकू बाळगून नागरिकांमध्ये भीतीचे वातावरण निर्माण केल्याच्या आरोपावरून शहर गुन्हे शाखेने एका तडीपार आरोपीला ताब्यात घेतले आहे. आरोपीकडून लोखंडी चाकू जप्त करण्यात आला असून त्याच्याविरुद्ध राजापेठ पोलीस ठाण्यात संबंधित कायद्यांनुसार गुन्हा दाखल करण्यात आला आहे.

पोलिसांनी दिलेल्या माहितीनुसार, बेलपुरा परिसरातील न्यू हायस्कूलच्या मागील मैदानात एक तडीपार आरोपी हातात घातक चाकू घेऊन फिरत असून नागरिकांमध्ये दहशत निर्माण करत असल्याची गुप्त माहिती शहर गुन्हे शाखेला मिळाली होती.

या माहितीची तातडीने दखल घेत पोलीस निरीक्षक अतुल वर यांच्या नेतृत्वाखालील विशेष पथक घटनास्थळी दाखल झाले. पोलिसांनी परिसरात सापळा रचून संशयित युवराज विजय कुरवाणे (वय २२, रा. बेलपुरा, अमरावती) याला ताब्यात घेतले.

पोलिसांनी केलेल्या झडतीदरम्यान आरोपीकडून सुमारे एक हजार रुपये किमतीचा लोखंडी चाकू जप्त करण्यात आला. पोलिसांच्या माहितीनुसार, संबंधित आरोपी यापूर्वी तडीपार करण्यात आला होता.

या प्रकरणी आरोपीविरुद्ध राजापेठ पोलीस ठाण्यात आर्म्स अॅक्ट तसेच इतर संबंधित कायद्यांनुसार गुन्हा दाखल करण्यात आला असून पुढील तपास सुरू आहे.

शहरातील कायदा व सुव्यवस्था अबाधित राखण्यासाठी समाजविघातक प्रवृत्तीच्या व्यक्तींविरुद्ध कठोर कारवाई सुरूच राहील, असे पोलिसांनी स्पष्ट केले आहे.

ही कारवाई पोलीस आयुक्त राकेश ओला यांच्या मार्गदर्शनाखाली अमरावती शहर गुन्हे शाखेच्या पथकाने केली. पोलिसांच्या तत्पर कारवाईमुळे संभाव्य अनुचित प्रकार टळल्याचे बोलले जात आहे.रण्या