नसरापूर बलात्कार व हत्या प्रकरण : आरोपीला मरेपर्यंत फाशीची शिक्षा
भीमराव कांबळे दोषी; सर्व सात आरोप सिद्ध झाल्याचा न्यायालयाचा निष्कर्ष
पुणे | प्रतिनिधी
राज्यभरात चर्चेत राहिलेल्या नसरापूर येथील अल्पवयीन मुलीवरील बलात्कार आणि हत्या प्रकरणात पुणे सत्र न्यायालयाने आरोपी भीमराव कांबळे याला मरेपर्यंत फाशीची शिक्षा सुनावली आहे. न्यायालयाने या प्रकरणातील सर्व सात आरोप सिद्ध झाल्याचा निष्कर्ष नोंदवत हा महत्त्वपूर्ण निर्णय दिला.
माहितीनुसार, या खटल्याची सुनावणी जलदगतीने पूर्ण करण्यात आली. अवघ्या ६० दिवसांत खटल्याचा निकाल देण्यात आला. अंतिम सुनावणीदरम्यान दोन्ही पक्षांचे युक्तिवाद ऐकून न्यायालयाने सुमारे १ तास १० मिनिटांत निकाल जाहीर केला.
निकाल देताना न्यायालयाने आरोपीविरुद्ध दाखल करण्यात आलेले सर्व सात गुन्हे सिद्ध झाल्याचे नमूद केले. तसेच बलात्कार आणि अत्यंत अमानुष स्वरूपाच्या हत्येप्रकरणी यापूर्वी सर्वोच्च आणि उच्च न्यायालयांनी दिलेल्या निर्णयांचा संदर्भ घेऊन शिक्षेबाबतचा निर्णय देण्यात आल्याचे न्यायालयाने स्पष्ट केले.
या प्रकरणातील पुरावे, साक्षीदारांचे जबाब आणि सरकारी पक्षाने सादर केलेल्या युक्तिवादाच्या आधारे आरोपी दोषी असल्याचे न्यायालयाने मान्य केले. त्यानंतर आरोपीला मरेपर्यंत फाशीची शिक्षा सुनावण्यात आली.
या निकालानंतर पीडित कुटुंबाला न्याय मिळाल्याची भावना व्यक्त होत असून, राज्यभरातून या निर्णयाचे स्वागत करण्यात येत आहे. दरम्यान, कायद्यानुसार आरोपीला या शिक्षेविरोधात उच्च न्यायालयात अपील करण्याचा अधिकार राहणार आहे.
