नागपूर-जबलपूर महामार्गावर भीषण अपघात; डुलकी लागल्याने मालवाहू वाहन झाडावर आदळले, एकाचा मृत्यू
नागपूर-जबलपूर राष्ट्रीय महामार्गावर आज दुपारी झालेल्या भीषण अपघाताने परिसर हादरून गेला आहे. भरधाव मालवाहू वाहन चालकाला डुलकी लागल्याने वाहन थेट महामार्गाखाली उतरून झाडावर आदळल्याची प्राथमिक माहिती समोर आली आहे. या भीषण धडकेत एका व्यक्तीचा जागीच मृत्यू झाला असून चालक गंभीर जखमी आहे.
आज दुपारी ३ ते ४ वाजताच्या सुमारास हा अपघात घडला. जबलपूरकडून नागपूरच्या दिशेने येत असलेले MH 20 EG 3627 क्रमांकाचे मालवाहू वाहन अचानक अनियंत्रित झाले आणि थेट महामार्गाखाली उतरले.
भरधाव वेगात असलेले वाहन रस्त्यालगतच्या झाडावर जोरदार आदळल्याने वाहनाचा समोरील भाग पूर्णपणे चक्काचूर झाला. अपघात इतका भीषण होता की वाहनातील मो. मतीन मो. इसा, वय ५०, रा. छत्रपती संभाजीनगर यांचा जागीच मृत्यू झाला.
तर चालक शेख नदीम शेख कबीर, वय ३९, हे गंभीर जखमी झाले असून त्यांच्यावर देवलापार ग्रामीण रुग्णालयात उपचार सुरू आहेत.
प्राथमिक माहितीनुसार, चालकाला झोपेची डुलकी लागल्याने वाहनावरील नियंत्रण सुटले आणि हा अपघात घडल्याची शक्यता व्यक्त करण्यात येत आहे.
घटनेची माहिती मिळताच देवलापार पोलीस तात्काळ घटनास्थळी दाखल झाले. तसेच ओरिएंटल टोल प्लाझा खुमारी येथील कर्मचारी प्रवीण ठाकूर, नितेश नेवारे आणि कुंजीलाल तुमडाम यांनीही तत्परतेने मदतकार्य सुरू केले.
मृतदेह शवविच्छेदनासाठी पाठवण्यात आला असून पोलिसांकडून पुढील तपास सुरू आहे. या अपघातामुळे महामार्गावरील वाढते अपघात आणि चालकांच्या थकव्याचा प्रश्न पुन्हा एकदा ऐरणीवर आला आहे.
महामार्गावरील वेग, थकवा आणि काही क्षणांची डुलकी किती जीवघेणी ठरू शकते, याचे हे धक्कादायक उदाहरण मानले जात आहे. वाहन चालवताना काळजी घेणे आणि पुरेशी विश्रांती घेणे किती महत्त्वाचे आहे, हे या दुर्घटनेतून पुन्हा अधोरेखित झाले आहे.
