मुंबई महानगरपालिकेच्या आयुक्तपदी अश्विनी भिडे यांची नियुक्ती; पहिल्यांदाच महिला आयुक्त
मुंबई महानगरपालिकेच्या (BMC) आयुक्तपदी वरिष्ठ आयएएस अधिकारी अश्विनी भिडे यांची नियुक्ती करण्यात आली आहे. महाराष्ट्र सरकारने मंगळवारी (३१ मार्च २०२६) हा महत्त्वाचा निर्णय घेतला असून, त्या मुंबई महानगरपालिकेच्या पहिल्या महिला आयुक्त ठरणार आहेत.
सध्याचे आयुक्त भूषण गगराणी यांचा कार्यकाळ ३१ मार्च रोजी पूर्ण होत असून, त्यानंतर अश्विनी भिडे पदभार स्वीकारण्याची शक्यता आहे. मिळालेल्या माहितीनुसार, त्या २०३० पर्यंत या पदावर कार्यरत राहतील.
मुंबई महानगरपालिका ही देशातील सर्वात श्रीमंत महानगरपालिका म्हणून ओळखली जाते. अशा महत्त्वाच्या संस्थेची जबाबदारी आता प्रथमच एका महिला अधिकाऱ्याकडे सोपवण्यात आल्याने या नियुक्तीकडे विशेष लक्ष लागले आहे.
अश्विनी भिडे या आपल्या प्रशासकीय कौशल्यासाठी ओळखल्या जातात. त्यांच्या नियुक्तीमुळे मुंबईतील नागरी सुविधा, पायाभूत विकास आणि प्रशासनिक कामकाजाला नवी दिशा मिळण्याची अपेक्षा व्यक्त केली जात आहे.
