अमरावतीत ₹९.३१ लाखांच्या थकबाकीमुळे मालमत्ता सील; महानगरपालिकेची कडक कारवाई

अमरावती, दि. २४ मार्च २०२६ (मंगळवार) – अमरावती महानगरपालिकाने थकबाकीदारांवर कडक कारवाई करत झोन क्रमांक ५ मधील भाजीबाजार परिसरातील जवाहर गेट येथे मोठी मालमत्ता सीलिंग केली. वार्ड क्रमांक E-4 मधील मालमत्ता क्रमांक १९६४/०१ ते ९१ या मालमत्तेवर ₹९,३१,७३९ इतकी मालमत्ता कराची थकबाकी असल्याने ही कारवाई करण्यात आली.

सदर मालमत्ता श्री आशीष बाहेती यांच्या नावावर असून, महानगरपालिकेकडून अनेक नोटिस व सूचना पाठवल्या गेल्या होत्या. तरीही थकबाकी न भरल्यामुळे महानगरपालिकेने कठोर पावले उचलली. मंगळवारी महानगरपालिकेच्या अधिकाऱ्यांच्या उपस्थितीत मालमत्तेची सीलिंग करण्यात आली, यावेळी संबंधित कर्मचारी, अधिकारी तसेच स्थानिक नागरिकही उपस्थित होते.

महानगरपालिकेच्या कर वसुली विभागाने शहरभर विशेष मोहीम राबविली असून, दीर्घकाळ कर न भरलेल्या मालमत्ताधारकांवर लक्ष केंद्रीत केले आहे. अधिकाऱ्यांनी स्पष्ट केले की, शहराच्या विकासकामांसाठी मालमत्ता कर हा महत्त्वाचा महसूल स्रोत असून, कर थकविणाऱ्यांवर कोणतीही तडजोड होणार नाही. थकबाकीदारांनी तात्काळ कर भरला नाही तर मालमत्ता सीलिंग, जप्ती किंवा इतर कायदेशीर कारवाई होईल असा इशारा देण्यात आला आहे.