रील बनवताना भीषण अपघात; 120 किमी वेगातील कार डिव्हायडरवर आदळली, दोघांचा मृत्यू
सोशल मीडियावर रील बनवण्याच्या नादात झालेल्या बेफिकीर ड्रायव्हिंगमुळे मोठी दुर्घटना घडली आहे. गुजरातमधील जेतपूर येथे 120 किलोमीटर वेगाने कार चालवत रील बनवणाऱ्या तरुणांची कार डिव्हायडरला धडकली. या अपघातात दोन तरुणांचा मृत्यू झाला असून एक जण गंभीर जखमी झाला आहे.
मिळालेल्या माहितीनुसार, अपघाताच्या वेळी कार अवध तिवारी चालवत होते. ते Hyundai Verna कार सुमारे 120 किलोमीटर प्रतितास वेगाने चालवत होते. याच दरम्यान ते मोबाईल फोनवर व्हिडिओ शूट करत Instagram वर रील बनवत असल्याचे समोर आले आहे.
अपघातापूर्वीच्या व्हिडिओमध्ये मागच्या सीटवर बसलेला एक युवक व्हिडिओ रेकॉर्ड करताना दिसत आहे. तर कार चालवत असलेले अवध तिवारी एका हातात मोबाईल घेऊन रील शूट करत आणि दुसऱ्या हाताने स्टिअरिंग सांभाळत असल्याचेही व्हिडिओमध्ये दिसत आहे.
तसेच पुढच्या सीटवर बसलेला आणखी एक युवकही वेगात धावणाऱ्या कारचा व्हिडिओ बनवत असल्याचे समोर आले आहे.
दरम्यान, कारचा वेग खूप जास्त असल्याने चालकाचा कारवरील ताबा सुटला आणि कार रस्त्याच्या डिव्हायडरला जोरदार धडकली. ही धडक इतकी भीषण होती की कार पूर्णपणे चकनाचूर झाली.
या अपघातात दोन तरुणांचा जागीच मृत्यू झाला असून एक युवक गंभीर जखमी झाला आहे. जखमीला उपचारासाठी रुग्णालयात दाखल करण्यात आले आहे.
सोशल मीडियासाठी जीव धोक्यात घालण्याची ही घटना पुन्हा एकदा समोर आली आहे. रील बनवण्याच्या नादात वाहतूक नियमांकडे दुर्लक्ष करणे किती घातक ठरू शकते, याचे हे भीषण उदाहरण आहे.
