अमरावती शहरातील ताज नगर नंबर 2 परिसरात प्रशासनाच्या दुर्लक्षामुळे नागरिकांना गंभीर समस्येला सामोरे जावे लागत आहे. परिसरातील सुन्नी मशिदीजवळील नाल्या अनेक दिवसांपासून तुंबलेल्या असून घाण पाणी थेट रस्त्यावर वाहत आहे. परिणामी दुर्गंधी पसरली असून नमाजासाठी मशिदीत येणाऱ्या भाविकांना मोठ्या अडचणींचा सामना करावा लागत आहे.
स्थानिकांच्या माहितीनुसार, साचलेल्या पाण्यातून मार्ग काढताना लहान मुले, वृद्ध आणि महिलांना विशेष त्रास सहन करावा लागत आहे. वारंवार तक्रारी करूनही प्रशासनाकडून कोणतीही ठोस कारवाई होत नसल्याचा आरोप नागरिकांनी केला आहे.
परिस्थिती असह्य झाल्याने संतप्त नागरिकांनी स्वतः पुढाकार घेत नाल्या साफ करण्यास सुरुवात केली. यावेळी स्थानिक लोकप्रतिनिधींविरोधात तीव्र नाराजी व्यक्त करण्यात आली. “फक्त निवडणुकीतच आमची आठवण येते का?” असा सवाल उपस्थित करत कायमस्वरूपी जलनिस्सारण व्यवस्था करण्याची मागणी करण्यात आली.
परिसरातील अस्वच्छतेमुळे डेंग्यू, मलेरिया यांसारख्या साथीच्या रोगांचा धोका वाढण्याची भीती व्यक्त केली जात आहे. पावसाळा तोंडावर असताना तातडीने नाल्यांची साफसफाई करून योग्य जलनिस्सारण व्यवस्था करावी, अशी मागणी नागरिकांकडून होत आहे.
ताज नगर परिसरातील ही गंभीर परिस्थिती प्रशासनासाठी इशारा मानली जात असून, नागरिकांच्या आरोग्याशी संबंधित प्रश्नांकडे तात्काळ लक्ष देणे गरजेचे आहे. आता प्रशासन आणि संबंधित लोकप्रतिनिधी कोणती ठोस पावले उचलतात, याकडे सर्वांचे लक्ष लागले आहे.
