कायद्यात राहाल तर फायद्यात राहाल : दत्तापूर पोलिसांची वाहतूक कोंडीवर धडक कारवाई
धामणगाव रेल्वे (अमरावती): शहरातील बेशिस्त वाहतूक आणि वाढत्या कोंडीला चाप लावण्यासाठी दत्तापूर पोलिसांनी आक्रमक पवित्रा घेतला आहे. ठाणेदार गिरीश ताथोड यांच्या मार्गदर्शनाखाली पोलिसांनी शहरात विशेष मोहीम राबवून वाहतूक नियमांचे उल्लंघन करणाऱ्यांना चांगलाच दणका दिला.
बेशिस्त पार्किंग आणि दुकानदारांना सक्त ताकीद
मुख्य रस्ते आणि बाजारपेठेत अस्ताव्यस्त उभ्या असलेल्या वाहनांमुळे नागरिकांना चालणेही कठीण झाले होते. सहायक पोलीस निरीक्षक गजानन गजभारे यांच्या नेतृत्वाखालील पथकाने अशा वाहनांवर दंडात्मक कारवाई केली. विशेष म्हणजे, दुकानदारांनी आपल्या दुकानासमोर ग्राहकांची वाहने शिस्तबद्ध लावण्याची जबाबदारी घ्यावी, अन्यथा कायदेशीर कारवाईला सामोरे जावे लागेल, असा सज्जड दमही पोलिसांनी दिला आहे.
पालकांनो सावधान! अल्पवयीन मुलांच्या हाती वाहन देऊ नका
या मोहिमेदरम्यान पोलिसांनी पालकांनाही महत्त्वाचे आवाहन केले आहे. शाळकरी आणि अल्पवयीन मुलांच्या हाती दुचाकी किंवा चारचाकी वाहने देणे कायद्याने गुन्हा आहे. मुलांच्या सुरक्षेसाठी पालकांनी खबरदारी घ्यावी, असे पोलिसांनी स्पष्ट केले.
लोकसहभागाचे आवाहन
शहरातील वाहतूक व्यवस्था सुरळीत ठेवण्यासाठी केवळ पोलीस कारवाई पुरेशी नाही, तर नागरिकांनीही स्वयंस्फूर्तीने नियम पाळावेत, असे आवाहन उपनिरीक्षक पुंडलिक चव्हाण आणि त्यांच्या टीमने केले आहे.
