सराफा बाजारात चांदीचा नवा उच्चांक, सोन्याच्याही दरात वाढ

सराफा बाजारात आज चांदीने नवा इतिहास रचला आहे. चांदीचा दर प्रति किलो २,०१,२५० रुपयांच्या ‘ऑल टाइम हाय’ पातळीवर पोहोचला आहे. आज चांदीच्या दरात तब्बल १,६०९ रुपयांची मोठी उसळी पाहायला मिळाली. जीएसटीशिवाय चांदीचा भाव २,०१,२५० रुपये असून ३ टक्के जीएसटीसह हा दर २,०७,२८७ रुपयांवर गेला आहे.

चांदीसोबतच सोन्याच्या दरातही तेजी कायम आहे. २४ कॅरेट सोन्याचा दर आज १३७ रुपयांनी वाढून १,३२,४५४ रुपये प्रति १० ग्रॅम झाला आहे. जीएसटीसह २४ कॅरेट सोन्यासाठी ग्राहकांना आता १,३६,४२७ रुपये मोजावे लागणार आहेत.

वर्षभरात सोन्या-चांदीची मोठी झेप

या वर्षातील दरवाढीचा कल पाहता सोन्या-चांदीच्या किमतींमध्ये लक्षणीय वाढ झाल्याचे स्पष्ट होते. बुधवारी बाजार बंद होताना चांदीचा दर (विना जीएसटी) १,९९,६४१ रुपये प्रति किलो तर सोन्याचा दर १,३२,३१७ रुपये प्रति १० ग्रॅम होता.
या वर्षात आतापर्यंत सोन्याच्या दरात ५६,७१४ रुपयांची वाढ झाली असून चांदीने तब्बल १,१५,२३३ रुपयांची झेप घेतली आहे. इंडिया बुलियन अँड ज्वेलर्स असोसिएशन (IBJA) दररोज दोन वेळा सोन्या-चांदीचे अधिकृत दर जाहीर करते.

कॅरेटनुसार सोन्याचे आजचे दर

• २३ कॅरेट सोने: १३७ रुपयांच्या वाढीसह १,३१,९२४ रुपये प्रति १० ग्रॅम
  (जीएसटीसह – १,३५,८८१ रुपये)
• २२ कॅरेट सोने: १२६ रुपयांनी महागून १,२१,३२८ रुपये प्रति १० ग्रॅम
  (जीएसटीसह – १,२४,९६७ रुपये)
• १८ कॅरेट सोने: १०३ रुपयांची वाढ, ९९,३४१ रुपये प्रति १० ग्रॅम
  (जीएसटीसह – १,०२,३२१ रुपये)
• १४ कॅरेट सोने: ८१ रुपयांनी वाढून ७७,४८६ रुपये प्रति १० ग्रॅम
  (जीएसटीसह – ७९,८१० रुपये)

ग्राहकांसाठी महत्त्वाची सूचना

वरील सर्व दरांमध्ये मेकिंग चार्जेसचा समावेश नाही. त्यामुळे प्रत्यक्ष दागिने खरेदी करताना अंतिम किंमत यापेक्षा अधिक असू शकते. सराफा बाजारातील ही तेजी गुंतवणूकदारांसह सामान्य ग्राहकांच्याही लक्षात राहणारी ठरत आहे.