जळगाव – रावेर तालुक्यातील शेतकरी या दिवसात पुन्हा एकदा शेतीकडे वळले आहेत. जून महिन्याच्या सुरुवातीला झालेल्या अल्प पावसाने खरीप पिकांची सुरुवात झाली होती, मात्र परतीच्या पावसाने कापूस, ज्वारी, मका यासह अन्य पिकांचे मोठ्या प्रमाणात नुकसान झाले. खरीप हंगामातील मेहनतीचं फळ शेतकऱ्यांच्या हातून निसटल्याने आर्थिक परिस्थिती डळमळली. तरीही या संकटावर मात करत शेतकरी पुन्हा उभे राहिले आहेत. रब्बी हंगामासाठी शेतीची मशागत सुरू झाली असून, शेतांमध्ये ट्रॅक्टरचा आवाज आणि शेतीतील हालचालींनी पुन्हा उत्साह निर्माण झाला आहे. अनेक शेतकरी खाजगी कर्ज, उसनवारी किंवा बँक कर्जाच्या आधारे पुन्हा शेतीत गुंतवणूक करत आहेत.
नोव्हेंबरमध्ये गहू पेरणी होणार असली तरी सध्या पेरणीपूर्व मशागत सुरू आहे. जमिनीची भुसभुशीत तयारी, खतांचा वापर आणि नांगरणी यामुळे रब्बी हंगामाच्या पिकांसाठी पायाभरणी सुरू झाली आहे. रावेर तालुक्यातील अमोदा, हातूर, मोहाडी, पातोंदी, वाडी यांसारख्या गावांत शेतकरी आणि शेतमजूर एकत्रितपणे मशागत करत आहेत. एका बाजूला आर्थिक संकट आणि दुसऱ्या बाजूला पिकाचा वाढता खर्च असूनही शेतकरी म्हणतात, “शेती सोडणं आमच्या रक्तात नाही.” खरीप हंगाम हातचा गेला असला तरी रब्बी पिकांमधून नुकसान भरून काढण्याचा त्यांचा निर्धार दृढ आहे. शेतातले नांगर, ट्रॅक्टर आणि शेतकऱ्यांचा उत्साह हेच दाखवतात की संकट कितीही मोठं असलं, तरी मेहनत आणि आशा कधीही मरत नाही.
