उत्तर प्रदेशातील बिजनौर जिल्ह्यातील चांदपूर पोलीस ठाण्याच्या हद्दीत अल्पवयीन मुलीवर अत्याचाराचा प्रकार उघडकीस आला आहे. पीडितेच्या तक्रारीनंतर पोलिसांनी तत्परतेने कारवाई करत आरोपी वृद्धाला अटक केली आहे. या घटनेमुळे परिसरात खळबळ उडाली आहे.
प्रकरणाचा तपशील :
६ सप्टेंबर रोजी सकाळी सव्वा अकरा वाजता १५ वर्षीय मुलगी घरगुती सामान आणण्यासाठी बाहेर पडली होती. त्यावेळी परिसरात राहणाऱ्या ६५ वर्षीय अब्दुल समद या वृद्धाने तिला आपल्या घरी बोलावले आणि तिच्यावर अत्याचार केला.
दरम्यान, मुलीचा लहान भाऊ अनस आणि त्याचा मित्र सादान घटनास्थळावरून जात होते. त्यांनी आरोपीची हरकत पाहून मोबाईलमध्ये व्हिडिओ रेकॉर्ड केला. हा पुरावा त्यांनी कुटुंबीयांना दाखवल्यानंतर प्रकरण उघड झाले. पीडितेकडून विचारपूस करताच तिने संपूर्ण प्रकार सांगितला.
कुटुंबीयांची धावपळ :
या घटनेनंतर आरोपीने कुटुंबाला धमकावण्याचा प्रयत्न केला. मात्र, दहशतीत असूनही पीडितेच्या वडिलांनी पोलिस ठाण्यात धाव घेत तक्रार दाखल केली.
पोलिसांची कारवाई :
प्रकरणाचे गांभीर्य लक्षात घेऊन पोलिसांनी पोक्सो कायद्यानुसार गुन्हा नोंदवला. काही तासांतच आरोपीला अटक करण्यात आली.
