संजय शिरसाटांचा व्हिडिओ व्हायरल: बॅगेत काय? अंजली दमानियांचे ‘ओपन चॅलेंज’!
मुंबई : ठाकरे गटाचे खासदार संजय राऊत यांनी मंत्री संजय शिरसाटांचा व्हिडिओ समोर आणल्याने राजकीय वर्तुळात खळबळ उडाली आहे. राऊतांनी माध्यमांसमोर मांडलेल्या व्हिडिओमध्ये दिसून येते की, संजय शिरसाट हे सिगारेट ओढताना दिसतात, तर त्यांच्या खोलीतच बेडच्या बाजूला एक पैशांनी भरलेली बॅग आहे. या व्हिडिओमुळे अनेक सवाल उपस्थित होत आहेत. यावर संजय शिरसाटांनी स्पष्टीकरण देताना म्हटले की, ती बॅग पैशांची नाही तर त्यात माझे कपडे आहेत. यावर आता सामजिक कार्यकर्त्या अंजली दमानियांनी शिरसाटांना ओपन चॅलेंज दिले आहे.
संजय शिरसाट टीकेचे धनी ठरत असताना यात अंजली दमानियांनीही त्यांना आव्हान दिले. दमानियांनी राऊतांनी शेअर केलेल्या व्हिडिओमधील एक फोटो टाकला आहे आणि शिरसाटांनी चॅलेंज केले. त्या म्हणाल्या, ‘मला संजय शिरसाटांची कमाल वाटते. बॅगमध्ये चक्क पैसे दिसत असताना, ते पैसे नाही, कपडे असतील असे शिरसाट म्हणूच कसे शकतात? मी त्या विडिओला झूम करून फोटो काढला आहे. ‘हा माझ्या घरच्या वीडियो आहे’ असे ते म्हणत आहेत. त्यांच्यात हिम्मत असेल आणि ते खरं बोलत असतील तर आजच्या आज त्यांनी त्यांच्या घरी माध्यमांना नेऊन दाखवावे की जी रूम व्हिडिओ मध्ये दिसत आहे ती खरच त्यांच्या घरची आहे.
दमानियांनी असेही नमूद केले की, ‘मला यात फक्त एक गोष्ट चुकीची वाटते की, कोणाच्याही बेडरूममध्ये सीसीटिव्ही लावणे अतिशय चुकीचे आहे.’ मात्र आता शिरसाटांच्या या व्हिडिओमुळे राजकीय वर्तुळात आणखी गदारोळ होण्याची शक्यता आहे.
संजय राऊतांचा दावा काय?
संजय राऊतांनी माध्यमांसमोर व्हिडिओ दाखवला. ज्यामध्ये संजय शिरसाट बेडवर बसलेले दिसतात आणि त्यांच्या रुममध्ये पैशांची बॅगही दिसत आहे. यावरुन तर्कवितर्कांना उधाण आलं आहे.
व्हिडिओबाबत संजय शिरसाटांना विचारले असता ते म्हणाले, व्हिडीओत जे घर दिसतंय ती माझी बेडरुम आहे. मी बनियनवर बसलेलो आहे. बाजूला माझा सर्वात लाडका कुत्रा आहे. तिथे एक बॅग ठेवलेली आहे. बॅक पैशांनी भरलेली नाही. तिच्यात कपडे आहेत, एवढे सारे पैसे मी बॅगमध्ये कसे ठेवेन. घरातील अलमाऱ्या मेल्या आहेत का? एवढे सारे पैसे असते तर मी ते अलमारीमध्ये ठेवले असते. राऊतांना पैशांशिवाय काहीही दिसत नाही.
