धारणीत चैत्र नवरात्रोत्सवाचा जल्लोष! दुर्गा मातेसमोर भक्तांचा उत्सवात न्हालेला उत्साह!
धारणी : धारणी शहरात सध्या भक्ती आणि उत्साहाचं वातावरण आहे. चैत्र नवरात्रोत्सव मोठ्या भक्तिभावाने आणि परंपरेने साजरा केला जात आहे. रंगभवन परिसरातील दुर्गा माता मंडप हा आकर्षणाचा केंद्रबिंदू ठरतोय.
धारणी शहरातील रंगभवन परिसरात चैत्र घटस्थापना पार पडली असून, भव्य आणि सुंदर अशा दुर्गा मातेसमोर भाविकांची गर्दी उसळतेय. मंडपात स्थापित केलेली दुर्गा माता मूर्ती अतिशय आकर्षक आणि दिव्य सजावटीने सजवलेली आहे. नवरात्रोत्सवानिमित्त नऊ दिवसांचे नऊ विशेष कार्यक्रम आयोजित करण्यात आले आहेत. रोज सकाळी आणि संध्याकाळी ढोल, ताशा, तबला आणि पेटीच्या गजरात महाआरतीचा कार्यक्रम पार पडतोय. भक्त मोठ्या श्रद्धेने आणि आनंदाने सहभागी होत आहेत. या उत्सवात शहरातील लहानथोर, महिला, तरुण-तरुणी मोठ्या संख्येने सहभागी होत आहेत. प्रत्येक दिवसाला विशेष उत्सवाचा साज चढत असून, मंदिर परिसर भक्तांच्या जयघोषांनी दुमदुमतोय. सांस्कृतिक कार्यक्रम, देवीची पालखी यात्रा, आरास सजावट आणि सामाजिक उपक्रमांतून हा उत्सव साजरा केला जात आहे. भक्तगण दररोज दर्शनासाठी रांगा लावत असून, वातावरण भक्तिभावाने भारलेलं आहे.
धारणी शहरातील चैत्र नवरात्रोत्सव केवळ एक धार्मिक उत्सव नाही, तर तो एक सामाजिक ऐक्य, श्रद्धा आणि संस्कृतीचा संगम आहे. या देवीच्या उत्सवाने शहरात सकारात्मकतेची ऊर्जा निर्माण केली असून, शेवटच्या दिवसापर्यंत भक्तीचा रंग असाच खुलत राहणार आहे.
