बुधवारपासून होते बेपत्ता; गुरुवारी निर्जन ठिकाणी आढळले मृतदेह, सर्व्हिस रायफल्सही गायब; दहशतवादी हल्ल्याचा संशय
जम्मू-कश्मीर : जम्मू-कश्मीरमधील किश्तवार जिल्ह्यातून सुरक्षायंत्रणांना हादरवणारी घटना समोर आली आहे. बुधवारपासून बेपत्ता असलेल्या जम्मू-कश्मीर पोलिसांच्या दोन स्पेशल पोलीस ऑफिसर्स (एसपीओ) जवानांचे मृतदेह गुरुवारी सकाळी आढळून आले. दोन्ही जवानांच्या शरीरावर गोळ्यांच्या अनेक खुणा आढळल्याने त्यांची हत्या करण्यात आल्याचा प्राथमिक संशय व्यक्त केला जात आहे. विशेष म्हणजे, घटनास्थळावरून दोन्ही जवानांच्या सरकारी सर्व्हिस रायफल्सही गायब असल्याने सुरक्षा यंत्रणा सतर्क झाल्या आहेत.
मृत जवानांची नावे बॉबीच चंद (वय ५७) आणि रशपाल कुमार (वय ४५) अशी आहेत. दोघेही जम्मू-कश्मीर पोलिसांच्या स्पेशल ऑपरेशन ग्रुपमध्ये (एसओजी) तैनात होते. मिळालेल्या माहितीनुसार, दोन्ही जवान दक्षिण कियार गावातील कॅम्पमधून ड्युटीसाठी बाहेर पडले होते. त्यांना धरना मरवाहा येथील लष्करी पोस्टवर जायचे होते. मात्र, ते नियोजित ठिकाणी पोहोचले नाहीत. त्यानंतर त्यांच्या बेपत्ता होण्याची माहिती मिळताच शोधमोहीम सुरू करण्यात आली.
बुधवारपासून सुरू असलेल्या शोधमोहिमेदरम्यान गुरुवारी सकाळी एका निर्जन ठिकाणी दोन्ही जवानांचे मृतदेह आढळून आले. त्यांच्या शरीरावर गोळ्यांच्या अनेक खुणा असल्याचे प्राथमिक माहितीतून समोर आले आहे. त्याचबरोबर त्यांच्याकडील सरकारी रायफल्सही घटनास्थळी नसल्याचे निदर्शनास आले. त्यामुळे या हत्येमागे नेमके कोण आहे आणि जवानांच्या शस्त्रांचे काय झाले, याचा तपास सुरक्षा यंत्रणा करीत आहेत.
दहशतवादी सहभागाचा संशय; संयुक्त पथकांची शोधमोहीम
या दुहेरी हत्येमागे दहशतवाद्यांचा हात असण्याची शक्यता सुरक्षा यंत्रणांकडून व्यक्त केली जात आहे. घटनेचे गांभीर्य लक्षात घेता जम्मू-कश्मीर पोलीस, लष्कर आणि केंद्रीय राखीव पोलीस दलाच्या (सीआरपीएफ) संयुक्त पथकांनी परिसरात शोधमोहीम तीव्र केली आहे.
दक्षिण कियार आणि मरवाहा परिसरातील जंगल तसेच डोंगराळ भागात संशयितांचा शोध घेतला जात आहे. या मोहिमेत श्वान पथकाचीही मदत घेतली जात आहे. दोन्ही जवानांची हत्या नेमकी कोणत्या कारणातून करण्यात आली, त्यात दहशतवाद्यांचा सहभाग आहे का आणि गायब झालेल्या सर्व्हिस रायफल्स कुठे आहेत, या सर्व बाबींचा तपास सुरू आहे.
या घटनेमुळे किश्तवार जिल्ह्यातील सुरक्षा व्यवस्थेसमोर नवे आव्हान निर्माण झाले असून, संपूर्ण परिसरात सुरक्षा यंत्रणांकडून सतर्कता वाढवण्यात आली आहे.
