मोबाईल चोरीच्या संशयावरून ५६ वर्षीय व्यक्तीची बेदम मारहाणीत हत्या!
लाकडी दांडा आणि चामड्याच्या बेल्टने मारहाण केल्याचा आरोप; चार तरुणांविरुद्ध हत्येचा गुन्हा दाखल
पारशिवनी : मोबाईल चोरीच्या संशयावरून ५६ वर्षीय व्यक्तीला बेदम मारहाण करून ठार केल्याची धक्कादायक घटना पारशिवनी तालुक्यातील डोरली गावात घडली आहे. राजू भोलासिंग तांडेकर असे मृत व्यक्तीचे नाव असून, या प्रकरणी पारशिवनी पोलिसांनी चार जणांविरुद्ध हत्येचा गुन्हा दाखल केला आहे. या घटनेमुळे डोरली गावात खळबळ उडाली आहे.
पोलिस तक्रारीनुसार, ११ सप्टेंबर रोजी रात्री सुमारे एक वाजल्यापासून पहाटे ५ वाजून १५ मिनिटांपर्यंत मोबाईल चोरी केल्याच्या संशयावरून राजू तांडेकर यांना मारहाण करण्यात आली. लाकडी दांडा आणि चामड्याच्या बेल्टने त्यांना मारहाण केल्याचा आरोप तक्रारीत करण्यात आला आहे.
मारहाणीनंतर राजू तांडेकर यांना गावातील वडाच्या झाडाखाली सोडून देण्यात आल्याचेही पोलिस तक्रारीत नमूद करण्यात आले आहे. घटनेची माहिती मिळाल्यानंतर नातेवाईकांनी त्यांना तातडीने डोरली प्राथमिक आरोग्य केंद्रात दाखल केले. मात्र, डॉक्टरांनी तपासणी केल्यानंतर त्यांना मृत घोषित केले.
या घटनेनंतर पारशिवनी पोलिसांनी कारवाई करत आलोक प्रमोद गजभिये, आदित्य केशवराव देशपांडे, साहिल पप्पू केवट आणि विशाल मारुतीराव वाघमारे या चार जणांविरुद्ध भारतीय न्याय संहितेच्या कलम १०३(१) आणि ३(५) अन्वये हत्येचा गुन्हा दाखल केला आहे.
घटनेचा पुढील तपास पारशिवनी पोलिस ठाण्याचे ठाणेदार किशोर शेरकी करीत आहेत. मोबाईल चोरीचा संशय नेमका कशाच्या आधारे घेण्यात आला, मारहाणीमागील नेमके कारण काय होते आणि घटनेतील सर्व परिस्थिती काय होती, याचा तपास पोलिसांकडून केला जात आहे.
केवळ चोरीच्या संशयावरून कायदा हातात घेतल्याचा आरोप असलेल्या या घटनेत एका व्यक्तीचा जीव गेल्याने गंभीर प्रश्न उपस्थित झाले आहेत. डोरली गावातील या घटनेमुळे परिसरात हळहळ व्यक्त होत असून, पोलिस तपासातून या प्रकरणातील संपूर्ण सत्य समोर येणार आहे.
