रात्री १ वाजेपर्यंत सी रोड परिसरातील बाजारपेठांमध्ये गर्दी; पोळ्याच्या खरेदीसाठी नागपूरकरांचा उत्साह शिगेला
नागपूर : घड्याळात रात्रीचा एक वाजलाय… मध्यरात्र केव्हाच उलटून गेलीय… मात्र नागपूरकरांचा पोळ्याचा उत्साह काही केल्या कमी होताना दिसत नाही. शहरातील सी रोड परिसरातील बाजारपेठांमध्ये रात्री उशिरापर्यंत नागरिकांची मोठी गर्दी पाहायला मिळाली. पोळ्याच्या खरेदीसाठी नागपूरकर अक्षरशः मध्यरात्रीपर्यंत बाजारपेठांमध्ये ठाण मांडून असल्याचे चित्र दिसून आले.
रात्रीचा सन्नाटा आणि बाजारपेठांमध्ये सुरू असलेली लगबग, असं वेगळंच चित्र यावेळी नागपुरात पाहायला मिळालं. मध्यरात्र उलटून रात्रीचा एक वाजला तरी सी रोड परिसरातील बाजारपेठांमध्ये नागरिकांची गर्दी कायम होती.
विशेषतः लहान मुलांसाठी मातीचे बैल, आकर्षक आणि रंगीबेरंगी सजावटीच्या वस्तू, पोळ्यासाठी लागणारे साहित्य आणि विविध पूजेच्या वस्तू खरेदी करण्यासाठी नागरिक मोठ्या संख्येने बाजारात दाखल झाले होते. रात्री उशिरापर्यंत दुकानदारही ग्राहकांच्या गर्दीमुळे व्यस्त असल्याचे पाहायला मिळाले.
पोळा हा महाराष्ट्राच्या ग्रामीण जीवनाशी घट्ट जोडलेला सण आहे. शेतकऱ्याच्या जीवनात बैलांचे असलेले महत्त्व आणि त्यांच्याप्रती असलेली कृतज्ञता व्यक्त करण्याचा हा दिवस. त्यामुळे पोळा हा केवळ बैलांचा किंवा शेतकऱ्यांचा सण न राहता महाराष्ट्राच्या संस्कृती आणि परंपरेचा अविभाज्य भाग बनला आहे.
शहरी भागातही पोळ्याची ही परंपरा आजही मोठ्या उत्साहाने जपली जाते. लहान मुलांसाठी मातीचे बैल घेणे, त्यांची सजावट करणे आणि पोळ्याच्या दिवशी पारंपरिक पद्धतीने त्यांची पूजा करणे, यासाठी नागरिकांमध्ये विशेष उत्साह दिसून येतो.
याच उत्साहाची झलक नागपूरच्या बाजारपेठांमध्ये मध्यरात्रीपर्यंत पाहायला मिळाली. रात्रीचा एक वाजला तरी बाजारपेठांमध्ये सुरू असलेली गर्दी आणि खरेदीची लगबग पोळ्याच्या सणाबद्दल असलेली नागरिकांची आस्था स्पष्ट करत होती.
मध्यरात्र उलटली… घड्याळात वाजले एक… पण पोळ्याची रौनक मात्र कायम! नागपूरच्या बाजारपेठांमधील हे चित्र महाराष्ट्राच्या समृद्ध परंपरेची आणि पोळ्यावरील नागरिकांच्या प्रेमाची जिवंत साक्ष ठरलं आहे.
