हैदरपुरा हत्याकांडाचा उलगडा : पोलिसांची झपाट्याने कारवाई; अवघ्या काही तासांत पाच आरोपी ताब्यात

जुन्या वैमनस्यातून २० वर्षीय युवकाची तलवार-चाकूने निर्घृण हत्या; गुन्हे शाखा व डीबी पथकाची तातडीची कारवाई

अमरावती शहरातील हैदरपुरा परिसरात झालेल्या थरारक हत्याकांडाचा उलगडा करत अमरावती शहर पोलिसांनी अवघ्या काही तासांत पाच आरोपींना ताब्यात घेतले आहे. जुन्या वैमनस्यातून २० वर्षीय शेख राहील उर्फ गणी शेख फारुक याच्यावर तलवार व चाकूने जीवघेणा हल्ला करण्यात आला होता. गंभीर जखमी झालेल्या राहीलचा उपचारादरम्यान मृत्यू झाला. या घटनेनंतर पोलिसांनी वेगाने तपासाची सूत्रे हलवत आरोपींना जेरबंद करण्यात यश मिळवले.

७ सप्टेंबर रोजी रात्री सुमारे ९.३० वाजण्याच्या सुमारास हैदरपुरा परिसरातील महापालिकेच्या सरकारी दवाखान्याच्या मैदानात शेख राहील उर्फ गणी शेख फारुक याच्यावर पाच जणांनी चाकू आणि तलवारीने प्राणघातक हल्ला केला. आरोपींनी त्याच्या डोक्यावर, मानेवर, छातीवर आणि पोटावर सपासप वार केले. गंभीर जखमी अवस्थेत राहीलला तातडीने रुग्णालयात दाखल करण्यात आले. मात्र, उपचार सुरू असतानाच डॉक्टरांनी त्याला मृत घोषित केले.

या प्रकरणी मृतकाचे वडील शेख फारुक शेख अहमद यांनी दिलेल्या तक्रारीवरून खोलापुरी गेट पोलीस ठाण्यात भारतीय न्याय संहितेअंतर्गत हत्या आणि सामूहिक हेतूसंदर्भात गुन्हा दाखल करण्यात आला.

घटनेची माहिती मिळताच नागपुरी गेट डीबी पथक आणि गुन्हे शाखेच्या युनिट क्रमांक १ ने समांतर तपास सुरू केला. प्रत्यक्षदर्शींची चौकशी, तांत्रिक माहिती आणि गुप्त बातमीदारांच्या मदतीने पोलिसांनी हल्ल्यामागील कारणांचा शोध घेतला. तपासादरम्यान ही हत्या जुन्या वैमनस्यातून झाल्याचे समोर आले.

नागपुरी गेट डीबी पथकाने शेख मोहसिन शेख रशीद याला अवघ्या एका तासात ताब्यात घेतले. त्यानंतर गुन्हे शाखेच्या युनिट क्रमांक १ ने कौशल्यपूर्ण तपास करत आणखी चार आरोपींना अटक केली. त्यामध्ये –

• सैयद शोऐब सैयद चांद
• अब्दुल नावेद अब्दुल सत्तार
• अब्दुल आसिफ उर्फ आशिक अब्दुल शहीद
• सैयद जुनेद सैयद जफर

यांचा समावेश आहे. सर्व आरोपींना पुढील तपासासाठी खोलापुरी गेट पोलिसांच्या ताब्यात देण्यात आले आहे.

हत्येमागील नेमके कारण काय, या कटात आणखी कोणाचा सहभाग आहे का, तसेच हल्ल्यासाठी वापरण्यात आलेली तलवार व चाकू कुठून आणण्यात आले, याचा सखोल तपास पोलीस करत आहेत.

पोलीस आयुक्त राकेश ओला, पोलीस उपआयुक्त शाम घुगे, पोलीस उपआयुक्त प्रांजली सोनवणे आणि सहायक पोलीस आयुक्त संजय खताळे यांच्या मार्गदर्शनाखाली गुन्हे शाखा, नागपुरी गेट डीबी पथक आणि खोलापुरी गेट पोलिसांनी ही कारवाई यशस्वीरीत्या पार पाडली.

हैदरपुरा हत्याकांडानंतर पोलिसांनी दाखवलेल्या जलद आणि प्रभावी कारवाईमुळे अवघ्या काही तासांत पाच आरोपी पोलिसांच्या ताब्यात आले आहेत. मात्र, या हत्येमागील संपूर्ण कट, त्याचे नेमके कारण आणि इतर संभाव्य आरोपींचा सहभाग याबाबतचा तपास अद्याप सुरू असून, पुढील तपासातून आणखी महत्त्वाची माहिती समोर येण्याची शक्यता आहे.