अजमेर शरीफला गेले कुटुंब अन् चोरट्यांनी बंद घर केले टार्गेट!

बाथरूमच्या व्हेंटिलेशनची खिडकी तोडून घरात प्रवेश; १७ लाख ५१ हजारांचा मुद्देमाल लंपास, नागपूर पोलिसांचा २४ तासांत छडा

नागपूर | प्रतिनिधी

कुटुंबीय अजमेर शरीफला धार्मिक यात्रेसाठी गेले आणि चोरट्यांनी बंद घराला लक्ष्य करत तब्बल १७ लाख ५१ हजार रुपयांचा मुद्देमाल लंपास केल्याची धक्कादायक घटना नागपुरात समोर आली आहे. चोरट्यांनी घराच्या बाथरूममधील व्हेंटिलेशनची खिडकी तोडून आत प्रवेश केला आणि घरातील रोकड व सोन्याच्या दागिन्यांवर डल्ला मारला. मात्र नागपूर पोलिसांनी या घरफोडीचा अवघ्या २४ तासांत छडा लावत आरोपींना ताब्यात घेतले आहे.

मिळालेल्या माहितीनुसार, संबंधित कुटुंबाने आपल्या घराला कुलूप लावून अजमेर शरीफला जाण्याचे नियोजन केले होते. १८ जुलैच्या रात्री कुटुंबीय रेल्वेने अजमेर शरीफच्या दिशेने रवाना झाले. दुसऱ्या दिवशी घरातील सीसीटीव्ही कॅमेऱ्यांचे फुटेज मोबाईलवर तपासत असताना घराच्या मागील बाजूचा वॉशिंग एरिया खुला असल्याचे त्यांच्या निदर्शनास आले.

संशय आल्याने नातेवाईकांनी तातडीने घरी जाऊन पाहणी केली. त्यावेळी घरातील सामान अस्ताव्यस्त पडलेले दिसून आले. सीसीटीव्ही फुटेज तपासले असता पहाटे अडीचच्या सुमारास तीन अज्ञात इसम बाथरूमच्या व्हेंटिलेशनची खिडकी तोडून घरात प्रवेश करताना दिसून आले.

रोकड आणि सोन्याच्या दागिन्यांवर डल्ला

चोरट्यांनी घरातील अलमारी फोडून त्यामधील सुमारे ५ लाख ५० हजार रुपयांची रोकड तसेच ३४ तोळे म्हणजेच ६४८ ग्रॅम सोन्याचे दागिने लंपास केले. चोरी झालेल्या मुद्देमालाची एकूण किंमत १७ लाख ५१ हजार रुपये असल्याचे समोर आले.

घटनेची माहिती मिळताच पोलिसांनी तपासाची चक्रे वेगाने फिरवली. सीसीटीव्ही फुटेज, तांत्रिक माहिती आणि इतर तपासाच्या आधारे पोलिसांनी अवघ्या २४ तासांत हिमांशु लोखंडे, विवेक उर्फ विक्की धोटे आणि एका विधिसंघर्षग्रस्त बालकाला ताब्यात घेतले.

त्यांच्याकडून चोरीतील रोकड, गुन्ह्यात वापरण्यात आलेली दुचाकी तसेच लोखंडी कटौणी जप्त करण्यात आली आहे.

सराईत आरोपी मुस्तफा उर्फ शानुचाही सहभाग

या प्रकरणाच्या तपासादरम्यान पोलिसांना मुस्तफा उर्फ शानु जमील खान या सराईत आरोपीचे नाव निष्पन्न झाले. पोलिसांनी त्याच्याकडून १८८.७ ग्रॅम सोन्याचे दागिने जप्त केल्याची माहिती समोर आली आहे.

मुस्तफा उर्फ शानु जमील खान याच्यावर यापूर्वीही घरफोडी, चोरी आणि चैन स्नॅचिंगसह अनेक गुन्ह्यांची नोंद असल्याचे तपासात समोर आले आहे. त्याच्यावर यापूर्वी मोक्का अंतर्गत कारवाई करण्यात आल्याचीही माहिती आहे.

बंद घर असल्याची संधी साधून चोरट्यांनी नियोजनबद्ध पद्धतीने घरात प्रवेश केला. मात्र सीसीटीव्ही फुटेज आणि तांत्रिक तपासाच्या आधारे पोलिसांनी तपासाला वेग देत आरोपींपर्यंत पोहोचण्यात यश मिळवले.

अवघ्या २४ तासांत १७ लाख ५१ हजार रुपयांच्या घरफोडीचा छडा लावत पोलिसांनी आरोपींना ताब्यात घेतल्याने नागपूर पोलिसांच्या जलद तपासाचे कौतुक होत आहे. या प्रकरणात आणखी कोणाचा सहभाग आहे का, चोरीचा उर्वरित मुद्देमाल कुठे आहे आणि आरोपींनी यापूर्वी अशाच प्रकारच्या आणखी किती घटना केल्या आहेत, याचा तपास सध्या सुरू आहे.