अमरावती शिक्षक मतदारसंघासाठी उबाठा शिवसेनेचा शड्डू ठोकला! दत्तात्रेय लहाने यांना उमेदवारी
पाच जिल्ह्यांच्या विभागीय मेळाव्यात निवडणुकीचा बिगुल; खासदार अरविंद सावंत यांचा निर्धार — शिक्षकांचा आमदार शिवसेनेचाच राहणार
अमरावती : अमरावती विभाग शिक्षक मतदारसंघाच्या निवडणुकीच्या पार्श्वभूमीवर शिवसेना उद्धव बाळासाहेब ठाकरे पक्षाने जोरदार तयारी सुरू केली आहे. बुलढाणा, वाशिम, यवतमाळ, अकोला आणि अमरावती या पाच जिल्ह्यांचा विभागीय मेळावा क्षितिज मंगल कार्यालयात आयोजित करण्यात आला. या मेळाव्यातून उबाठा शिवसेनेने आगामी निवडणुकीचा बिगुल वाजवत आपला उमेदवारही जाहीर केला.
शिवसेना उद्धव बाळासाहेब ठाकरे शिक्षक संघटनेच्या वतीने प्राध्यापक दत्तात्रेय श्रीराम लहाने यांना अमरावती विभाग शिक्षक मतदारसंघासाठी उमेदवारी देण्यात आली आहे. दत्तात्रेय लहाने हे बुलढाणा येथील शिवसेना शिक्षक संघटनेचे जिल्हाध्यक्ष आहेत. त्यांच्या उमेदवारीमुळे शिक्षक मतदारसंघातील राजकीय समीकरणांना आता वेग येण्याची शक्यता आहे.
या विभागीय मेळाव्याला खासदार डॉ. अरविंद सावंत, आमदार नितीन बापू देशमुख, आमदार गजानन लवटे आणि आमदार सिद्धार्थ खरात यांची प्रमुख उपस्थिती होती. यावेळी पक्षाच्या पदाधिकाऱ्यांसह पाचही जिल्ह्यांतील शिक्षक आणि कार्यकर्ते मोठ्या संख्येने उपस्थित होते.
शिक्षकांना संबोधित करताना खासदार डॉ. अरविंद सावंत यांनी आगामी निवडणुकीत शिक्षकांचा आमदार शिवसेना पक्षाचाच राहील, असा निर्धार व्यक्त केला. त्यामुळे उबाठा शिवसेनेने या निवडणुकीला प्रतिष्ठेची लढाई मानल्याचे चित्र या मेळाव्यातून पाहायला मिळाले.
विशेष म्हणजे, यापूर्वी श्रीकांत देशपांडे यांना शिवसेनेकडून उमेदवारी मिळाली होती आणि ते निवडून आले होते. आता प्राध्यापक दत्तात्रेय लहाने यांना उमेदवारी देत शिवसेनेने पुन्हा एकदा शिक्षक मतदारसंघावर आपला दावा मजबूत करण्याचा प्रयत्न केला आहे.
पाच जिल्ह्यांमध्ये संघटनात्मक बांधणी, शिक्षकांशी संपर्क आणि निवडणुकीची रणनीती यावर पक्षाकडून भर दिला जाणार आहे. त्यामुळे आगामी काळात या मतदारसंघात उमेदवारांच्या प्रचारासोबतच राजकीय आरोप-प्रत्यारोपांनाही वेग येण्याची शक्यता आहे.
दत्तात्रेय लहाने यांच्या उमेदवारीनंतर अमरावती विभाग शिक्षक मतदारसंघातील निवडणुकीचे चित्र अधिक स्पष्ट होत असून, शिक्षकांचा कौल कोणाच्या बाजूने जाणार, याकडे आता राजकीय वर्तुळासह पाचही जिल्ह्यांतील शिक्षकांचे लक्ष लागले आहे.
