नेपाळच्या महापुरात ९७ वर्षीय महिलेचा चमत्कारिक बचाव; चार तास ढिगाऱ्याखाली राहूनही जिवंत!
चिखल आणि सिमेंटच्या ढिगाऱ्याखाली अडकल्या होत्या गुणा माया बोहरा; जेसीबीच्या मदतीने सुखरूप बाहेर, रेस्क्यूचा व्हिडिओ व्हायरल
नेपाळ : नेपाळमध्ये आलेल्या भीषण महापुराने आणि भूस्खलनाने संपूर्ण देशाला हादरवून सोडलं आहे. अनेक भागांमध्ये घरं पत्त्यांसारखी कोसळली, तर चिखलाच्या प्रचंड लोंढ्यामुळे मोठ्या प्रमाणात नुकसान झालं आहे. या भीषण परिस्थितीत ९७ वर्षीय गुणा माया बोहरा यांचा चमत्कारिक बचाव करण्यात आला आहे. तब्बल चार तास चिखल आणि सिमेंटच्या ढिगाऱ्याखाली अडकूनही त्यांनी मृत्यूला हुलकावणी दिली.
मिळालेल्या माहितीनुसार, गुणा माया बोहरा आपल्या घरात असताना अचानक डोंगरावरून चिखल आणि पाण्याचा प्रचंड लोंढा आला. काही क्षणांतच त्यांच्या घरावर चिखलाचा ढिगारा कोसळला आणि त्या त्याखाली अडकल्या.
महापुराच्या पाण्यातून कुटुंबीयांनी झाडांना दोर बांधून कसाबसा मार्ग काढला. त्याचवेळी ढिगाऱ्यातून गुणा माया बोहरा यांच्या शरीराचा वरचा भाग दिसून आला. त्यांचा श्वास सुरू असल्याचे लक्षात येताच स्थानिक नागरिक, पोलीस आणि नेपाळ लष्कराचे जवान तातडीने बचावकार्यात उतरले.
तब्बल चार तास अथक प्रयत्न केल्यानंतर जेसीबीच्या मदतीने गुणा माया बोहरा यांना ढिगाऱ्यातून सुखरूप बाहेर काढण्यात आलं. त्यांना बाहेर काढल्यानंतर त्यांच्या चेहऱ्यावर दिसलेलं हसू पाहून बचाव पथकातील जवानांचाही जीव भांड्यात पडला.
या संपूर्ण रेस्क्यूचा व्हिडिओ सध्या सोशल मीडियावर मोठ्या प्रमाणात व्हायरल होत आहे. चार तास ढिगाऱ्याखाली अडकूनही जिवंत राहिलेल्या गुणा माया बोहरा यांच्या जगण्याच्या दुर्दम्य इच्छाशक्तीचं सर्वत्र कौतुक होत आहे.
नेपाळमधील या नैसर्गिक आपत्तीमुळे अनेक कुटुंबं बेघर झाली असून, अनेक जण पुराच्या पाण्यात वाहून गेल्याची माहिती आहे. मात्र या काळोखात गुणा माया बोहरा यांचा बचाव आशेचा किरण ठरला आहे.
सध्या गुणा माया बोहरा यांच्यावर रुग्णालयात उपचार सुरू असून, त्यांची प्रकृती सुधारत असल्याचे सांगण्यात येत आहे.
निसर्गाचा प्रकोप कितीही भीषण असला, तरी जगण्याची जिद्द आणि आशा माणसाला मृत्यूच्या दाढेतूनही बाहेर काढू शकते, याचं जिवंत उदाहरण म्हणजे ९७ वर्षीय गुणा माया बोहरा यांचा हा चमत्कारिक बचाव.
