एसटी बसअभावी विद्यार्थ्यांचे अनोखे आंदोलन; आगार व्यवस्थापकांच्या कार्यालयासमोरच भरवली प्रतीकात्मक शाळा
मेहकर तालुक्यातील कंबरखेड–गोंढाळा मार्गावर वर्षभरापासून बस सेवा बंद; ८० ते ९० विद्यार्थ्यांचा शिक्षणाचा प्रश्न ऐरणीवर
मेहकर | प्रतिनिधी
बुलढाणा जिल्ह्यातील मेहकर तालुक्यातील कंबरखेड आणि गोंढाळा गावांतील विद्यार्थ्यांनी एसटी बस सेवा सुरू करण्याच्या मागणीसाठी अनोखे आंदोलन केले. गेल्या वर्षभरापासून या मार्गावर नियमित बस सेवा नसल्याने शिक्षणासाठी ये-जा करणाऱ्या सुमारे ८० ते ९० विद्यार्थ्यांना मोठ्या अडचणींचा सामना करावा लागत आहे. वारंवार निवेदने देऊनही प्रश्न मार्गी न लागल्याने विद्यार्थ्यांनी मेहकर एसटी आगार व्यवस्थापकांच्या कार्यालयासमोर प्रतीकात्मक शाळा भरवत प्रशासनाचे लक्ष वेधले.
कंबरखेड आणि गोंढाळा येथील विद्यार्थी दररोज शिक्षणासाठी मेहकर शहरात येतात. मात्र या मार्गावर नियमित एसटी बस सेवा उपलब्ध नसल्याने त्यांना खासगी वाहनांचा आधार घ्यावा लागत आहे. त्यामुळे विद्यार्थ्यांसह पालकांवरही अतिरिक्त आर्थिक भार पडत असून, शिक्षणासाठीचा प्रवास अधिक कष्टदायक बनला आहे.
गेल्या बारा महिन्यांपासून ग्रामस्थ, पालक आणि विद्यार्थ्यांनी बस सेवा सुरू करण्यासाठी मेहकर आगार प्रशासनाकडे अनेक वेळा निवेदने सादर केली. मात्र प्रत्येक वेळी केवळ आश्वासने मिळाल्याचा आरोप आंदोलकांनी केला आहे.
या पार्श्वभूमीवर संतप्त विद्यार्थ्यांनी सोमवारी मेहकर एसटी आगार व्यवस्थापकांच्या कार्यालयासमोरच प्रतीकात्मक शाळा भरवून अनोख्या पद्धतीने आंदोलन केले. या आंदोलनामुळे काही काळ आगार परिसरात लक्षवेधी वातावरण निर्माण झाले.
आंदोलनानंतर वरिष्ठ अधिकाऱ्यांशी संपर्क साधण्यात आला असता, एक ते दोन दिवसांत या समस्येवर मार्ग काढण्याचा प्रयत्न केला जाईल, असे आश्वासन प्रशासनाकडून देण्यात आले. मात्र, गेल्या वर्षभरापासून अशाच प्रकारची आश्वासने मिळत असल्याने विद्यार्थी आणि पालकांनी प्रशासनाच्या भूमिकेबद्दल नाराजी व्यक्त केली.
आता कंबरखेड–गोंढाळा मार्गावर एसटी बस सेवा प्रत्यक्षात कधी सुरू होते, याकडे विद्यार्थी, पालक आणि ग्रामस्थांचे लक्ष लागले आहे. विद्यार्थ्यांच्या शिक्षणाशी संबंधित हा प्रश्न प्रशासन किती तत्परतेने सोडवते, हे येत्या काही दिवसांत स्पष्ट होणार आहे.
