दारुड्या पतीच्या छळाला कंटाळून विवाहितेचे टोकाचे पाऊल; अडीच वर्षांचे लेकरू झाले आईविना, पती अटकेत
नागपूर : नागपूर शहरातून एक अत्यंत हृदयद्रावक घटना समोर आली आहे. कौटुंबिक कलह, पतीचे व्यसन आणि कथित मानसिक-शारीरिक छळ यामुळे त्रस्त झालेल्या 28 वर्षीय विवाहितेने टोकाचे पाऊल उचलल्याची घटना उघडकीस आली आहे. या प्रकरणात महिलेचा उपचारादरम्यान मृत्यू झाला असून पोलिसांनी पतीविरुद्ध आत्महत्येस प्रवृत्त केल्याचा गुन्हा दाखल करून त्याला अटक केली आहे.
मिळालेल्या माहितीनुसार, नागपूरच्या हुडकेश्वर पोलीस ठाण्याच्या हद्दीतील अंबिका लेआऊट परिसरात राहणाऱ्या अंकिता नितीन डांगसे यांनी गळफास घेतल्याची घटना घडली. गंभीर अवस्थेत त्यांना तातडीने रुग्णालयात दाखल करण्यात आले होते. मात्र उपचार सुरू असताना शुक्रवारी दुपारी मेडिकल रुग्णालयात त्यांची प्राणज्योत मालवली.
या घटनेनंतर मृत महिलेच्या नातेवाईकांनी पती नितीन डांगसे आणि सासू पार्वताबाई डांगरे यांच्यावर गंभीर आरोप केले आहेत. पती दारूच्या व्यसनाधीन असल्याने अंकिता यांना वारंवार मानसिक आणि शारीरिक त्रास सहन करावा लागत होता, असा आरोप कुटुंबीयांनी केला आहे. कौटुंबिक वाद आणि सततच्या छळामुळेच त्यांनी हे टोकाचे पाऊल उचलल्याचा दावा नातेवाईकांकडून करण्यात आला आहे.
घटनेची माहिती मिळाल्यानंतर हुडकेश्वर पोलिसांनी प्रकरणाची गंभीर दखल घेत तपास सुरू केला. प्राथमिक चौकशीनंतर आत्महत्येस प्रवृत्त केल्याप्रकरणी गुन्हा दाखल करण्यात आला असून आरोपी पतीला अटक करण्यात आली आहे. सासूविरुद्धही कायदेशीर कारवाईची प्रक्रिया सुरू असल्याची माहिती पोलिसांनी दिली.
या संपूर्ण घटनेतील सर्वात वेदनादायक बाब म्हणजे अंकिता यांच्या पश्चात अवघे अडीच वर्षांचे चिमुकले लेकरू आईच्या मायेपासून कायमचे वंचित झाले आहे. आईच्या निधनामुळे कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे.
दरम्यान, पोलिसांकडून या प्रकरणाचा सखोल तपास सुरू असून कौटुंबिक छळासंदर्भातील सर्व आरोपांची पडताळणी केली जात आहे. तपासानंतरच या प्रकरणातील संपूर्ण सत्य समोर येणार आहे.
कौटुंबिक छळ, व्यसनाधीनता आणि मानसिक तणाव यांचे परिणाम किती गंभीर असू शकतात, याची जाणीव करून देणारी ही घटना आहे. एका तरुण महिलेचा मृत्यू आणि एका निष्पाप बालकाच्या आयुष्यात निर्माण झालेली पोकळी समाजासाठी चिंतनाचा विषय ठरत आहे.
