उकाड्यापासून दिलासा मिळवताना काळाचा घाला! कूलरमध्ये पाणी टाकताना विजेचा धक्का; मेहकरातील तरुणाचा जागीच मृत्यू
बुलढाणा : जिल्ह्यातील मेहकर शहरातून एक अत्यंत दुर्दैवी घटना समोर आली आहे. कूलरमध्ये पाणी टाकताना विजेचा जोरदार धक्का लागून 24 ते 25 वर्षीय तरुणाचा मृत्यू झाला. या घटनेमुळे मेहकर शहरातील रामनगर परिसरात शोककळा पसरली असून शिंदे कुटुंबावर दुःखाचा डोंगर कोसळला आहे.
मिळालेल्या माहितीनुसार, गौरव शिंदे हे दुपारच्या सुमारास आपल्या घरी जेवण करत होते. वाढत्या उकाड्यामुळे घरातील कूलरमध्ये पाणी कमी झाल्याने ते पाणी भरण्यासाठी उठले. मात्र कूलर सुरू असतानाच त्यांनी त्यामध्ये पाणी टाकण्याचा प्रयत्न केला.
यावेळी अचानक त्यांना विजेचा जोरदार धक्का बसला. धक्का इतका तीव्र होता की गौरव शिंदे यांचा घटनास्थळीच मृत्यू झाला. घटनेची माहिती मिळताच शेजारी आणि नातेवाईकांनी तातडीने घटनास्थळी धाव घेतली, मात्र तोपर्यंत उशीर झाला होता.
तरुण वयात झालेल्या या आकस्मिक मृत्यूमुळे परिसरात हळहळ व्यक्त केली जात आहे. कुटुंबीयांवर दुःखाचा डोंगर कोसळला असून नातेवाईक आणि मित्रपरिवारातून शोक व्यक्त करण्यात येत आहे.
दरम्यान, या घटनेनंतर विद्युत उपकरणे वापरताना सुरक्षिततेच्या नियमांचे पालन करण्याचे आवाहन करण्यात आले आहे. तज्ज्ञांच्या मते, कूलरमध्ये पाणी टाकण्यापूर्वी वीजपुरवठा पूर्णपणे बंद करणे आवश्यक आहे. तसेच वायरिंग, प्लग, स्विच आणि अर्थिंगची नियमित तपासणी करणेही तितकेच महत्त्वाचे आहे.
कूलर, पंखे किंवा इतर कोणतेही विद्युत उपकरण हाताळताना थोडासा निष्काळजीपणाही जीवघेणा ठरू शकतो. मेहकरातील ही घटना प्रत्येकासाठी इशारा देणारी असून घरगुती विद्युत उपकरणांचा वापर करताना अत्यंत सावधगिरी बाळगण्याची गरज पुन्हा अधोरेखित झाली आहे.
