मेहकरमध्ये देशी दारू दुकानामागे आढळला मृतदेह; उष्माघाताने मृत्यूचा प्राथमिक अंदाज

मेहकर शहरात काल रात्री एक धक्कादायक घटना समोर आली आणि संपूर्ण परिसरात खळबळ उडाली. देशी दारू दुकानाच्या मागील परिसरात एका अज्ञात व्यक्तीचा मृतदेह आढळून आल्याने नागरिकांमध्ये भीतीचे वातावरण निर्माण झाले होते. मात्र मेहकर पोलिसांनी वेगाने तपास करत मृत व्यक्तीची ओळख पटवली असून उष्माघाताने मृत्यू झाल्याचा प्राथमिक अंदाज व्यक्त करण्यात आला आहे.

मेहकर-रिसोड रोडवरील सोनाटी रोड परिसरात मल्टी हॉस्पिटलजवळ देशी दारू दुकानाच्या मागील बाजूस एका व्यक्तीचा मृतदेह आढळून आला आणि परिसरात एकच खळबळ उडाली.

घटनेची माहिती मिळताच मेहकर पोलिसांनी तात्काळ घटनास्थळी धाव घेत पंचनामा सुरू केला. सुरुवातीला मृत व्यक्तीची ओळख पटत नसल्याने पोलिसांनी सोशल मीडियाच्या माध्यमातून नागरिकांना आवाहन केले.

घटनास्थळी अंदाजे 35 वर्षीय व्यक्ती मृतावस्थेत आढळून आली होती. मृतदेहावर कोणत्याही प्रकारच्या जखमा नसल्याचे पोलिस तपासात समोर आले.

त्यानंतर पोलिसांनी विविध अंगांनी तपास सुरू केला आणि मृत व्यक्तीची ओळख ज्ञानेश्वर सीताराम खोसरे अशी पटली. ते मूळचे लोणार तालुक्यातील अजिसपूर येथील रहिवासी असून सध्या चिखली तालुक्यातील वाघजाळ येथे राहत होते.

दरम्यान, वाढत्या तापमानाचा फटका आता जीवघेणा ठरत असल्याचे या घटनेतून पुन्हा समोर आले आहे. मे महिन्याच्या अखेरीस नवतप्याच्या काळात तापमान तब्बल 42 ते 43 अंशांपर्यंत पोहोचले आहे.

उष्णतेमुळे उष्माघात होऊन ज्ञानेश्वर खोसरे यांचा मृत्यू झाल्याचा प्राथमिक अंदाज पोलिसांनी व्यक्त केला आहे. शवविच्छेदन अहवालानंतर मृत्यूचे नेमके कारण स्पष्ट होणार आहे.

या प्रकरणाचा तपास उपविभागीय पोलीस अधिकारी संतोष खाडे आणि मेहकर पोलीस स्टेशनचे ठाणेदार व्यंकटेश आलेवार यांच्या मार्गदर्शनाखाली सुरू आहे.

दरम्यान, प्रशासनाने नागरिकांना कडक उन्हात आवश्यक ती खबरदारी घेण्याचे आवाहन केले आहे.

मेहकरमध्ये अज्ञात मृतदेह आढळल्याने सुरुवातीला खळबळ उडाली होती. मात्र पोलिसांच्या सतर्क तपासामुळे मृत व्यक्तीची ओळख पटली आणि उष्माघातामुळे मृत्यू झाल्याचा प्राथमिक अंदाज समोर आला. वाढत्या उष्णतेमुळे नागरिकांनी काळजी घेणे आता अत्यंत आवश्यक बनले आहे.