वाशिमच्या पद्मतीर्थ परिसरात जैववैद्यकीय कचरा उघड्यावर; नागरिकांच्या आरोग्याला धोका!
वापरलेली इंजेक्शन्स, सलाईन आणि वैद्यकीय कचऱ्यामुळे दुर्गंधी; दोषींवर कारवाई करण्याचे जिल्हा शल्यचिकित्सकांचे आश्वासन
वाशिम शहरातील पद्मतीर्थ परिसरात जैववैद्यकीय कचरा उघड्यावर टाकला जात असल्याचा गंभीर प्रकार समोर आला आहे. वापरलेली इंजेक्शन्स, सलाईन आणि इतर वैद्यकीय कचऱ्यामुळे परिसरात दुर्गंधी पसरली असून, नागरिकांसह जनावरांच्या आरोग्याचा प्रश्न निर्माण झाला आहे. जैववैद्यकीय कचऱ्याची स्वतंत्र विल्हेवाट लावण्याची व्यवस्था असतानाही हा कचरा उघड्यावर कोण टाकत आहे, असा सवाल उपस्थित होत आहे. या प्रकरणाची चौकशी करून दोषींवर कठोर कारवाई करण्याची मागणी होत आहे.
वाशिम : शहरातील पद्मतीर्थ परिसरात जैववैद्यकीय कचरा उघड्यावर टाकला जात असल्याचा प्रकार समोर आल्याने परिसरातील स्वच्छता आणि सार्वजनिक आरोग्याचा प्रश्न ऐरणीवर आला आहे. वापरलेली इंजेक्शन्स, सलाईन आणि अन्य वैद्यकीय कचरा परिसरात पडून असल्याने नागरिकांमध्ये चिंता व्यक्त केली जात आहे.
जैववैद्यकीय कचऱ्याची विल्हेवाट लावण्यासाठी स्वतंत्र व्यवस्था असतानाही हा कचरा उघड्यावर कसा आणि कोणाकडून टाकला जात आहे, असा प्रश्न उपस्थित होत आहे. या कचऱ्यामुळे परिसरात दुर्गंधी पसरत असून, नागरिकांसह मोकाट जनावरांच्या आरोग्यालाही धोका निर्माण होण्याची शक्यता आहे. विशेषतः वापरलेल्या सुया आणि इंजेक्शन्सच्या संपर्कात आल्यास दुखापत होण्याचा तसेच संसर्गाचा धोका संभवतो.
वैद्यकीय कचऱ्याची योग्य पद्धतीने विल्हेवाट लावणे ही संबंधित आरोग्य संस्थांची महत्त्वाची जबाबदारी आहे. त्यामुळे पद्मतीर्थ परिसरात हा कचरा कोणी टाकला, त्यामागे कोणती आरोग्य संस्था किंवा संबंधित व्यक्ती जबाबदार आहे आणि कचरा व्यवस्थापनाच्या नियमांचे पालन केले जात आहे का, याची सखोल चौकशी करण्याची मागणी होत आहे.
दरम्यान, वाशिमचे जिल्हा शल्यचिकित्सक डॉ. अनिल कावरखे यांनी या प्रकरणात दोषी आढळणाऱ्यांवर योग्य ती कारवाई करण्याचे आश्वासन दिले आहे. त्यामुळे आता संबंधित यंत्रणेकडून या प्रकरणाची चौकशी करून प्रत्यक्षात कोणती पावले उचलली जातात, याकडे नागरिकांचे लक्ष लागले आहे.
