पेट्रोल-डिझेल पुन्हा महाग! चार दिवसांत दुसरी दरवाढ; सर्वसामान्यांच्या खिशाला मोठा फटका
महागाईच्या झळा सहन करणाऱ्या सर्वसामान्य नागरिकांना पुन्हा एकदा मोठा धक्का बसला आहे. पेट्रोल आणि डिझेलच्या दरात अवघ्या चार दिवसांत दुसऱ्यांदा वाढ करण्यात आली आहे. यापूर्वी १५ मे रोजी इंधनाच्या दरात तब्बल ३ रुपयांची वाढ करण्यात आली होती. त्यानंतर आता १९ मेपासून पेट्रोल आणि डिझेलच्या किमतीत पुन्हा सुमारे ८७ ते ९१ पैशांची वाढ झाली आहे.
या सलग दोन दरवाढींमुळे एका आठवड्यात पेट्रोल आणि डिझेल जवळपास ४ रुपयांनी महाग झाले आहेत. त्यामुळे वाहनधारकांसह सर्वसामान्य नागरिकांच्या खर्चात आणखी वाढ होण्याची शक्यता व्यक्त केली जात आहे.
तज्ज्ञांच्या मते, मध्यपूर्वेतील युद्धजन्य परिस्थिती, आंतरराष्ट्रीय बाजारात कच्च्या तेलाच्या वाढलेल्या किंमती आणि डॉलरच्या तुलनेत रुपयाची झालेली घसरण ही या दरवाढीमागची प्रमुख कारणे आहेत. भारत मोठ्या प्रमाणावर कच्चे तेल आयात करतो. त्यामुळे रुपयाचे अवमूल्यन झाल्यास तेल आयातीचा खर्च वाढतो आणि त्याचा थेट परिणाम इंधनाच्या दरांवर होतो.
इंधन दरवाढीचा परिणाम केवळ वाहनधारकांपुरता मर्यादित राहत नाही. मालवाहतूक खर्च वाढल्याने भाजीपाला, फळे, धान्य, दूध आणि इतर जीवनावश्यक वस्तूंच्या किंमती वाढण्याची शक्यता असते. त्यामुळे आधीच महागाईचा सामना करणाऱ्या सर्वसामान्यांच्या घरगुती बजेटवर आणखी ताण पडणार आहे.
देशातील अनेक शहरांमध्ये पेट्रोल आणि डिझेलचे दर आता मागील चार वर्षांतील उच्चांकावर पोहोचले आहेत. जागतिक परिस्थितीत सुधारणा झाली नाही, तर आगामी काळात इंधनाच्या दरात आणखी वाढ होण्याची शक्यता तज्ज्ञांनी व्यक्त केली आहे.
महागाईच्या पार्श्वभूमीवर झालेली ही दरवाढ सर्वसामान्यांसाठी चिंतेची बाब ठरत असून सरकारकडून काही दिलासा मिळणार का, याकडे आता संपूर्ण देशाचे लक्ष लागले आहे.
