जागतिक डेंगू दिनानिमित्त अमरावती मनपात आरोग्य कर्मचाऱ्यांचा भव्य सत्कार
अमरावती : जागतिक डेंगू दिनानिमित्त अमरावती महानगरपालिकेच्या आरोग्य विभागात प्रेरणादायी आणि उत्साहपूर्ण वातावरण पाहायला मिळाले. मनपाच्या डॉ. बाबासाहेब आंबेडकर सभागृहात आयोजित विशेष कार्यक्रमात डेंगू, मलेरिया, चिकनगुनिया आणि हत्तीरोग यांसारख्या कीटकजन्य आजारांवर प्रभावी नियंत्रण ठेवणाऱ्या आरोग्य कर्मचाऱ्यांचा गौरव करण्यात आला.
या सोहळ्यात डॉक्टर्स, नर्सेस, एमपीडब्ल्यू, आशा वर्कर्स आणि इतर आरोग्य सेवकांचा प्रशस्तीपत्र व स्मृतिचिन्ह देऊन सन्मान करण्यात आला. नागरिकांना दर्जेदार आरोग्यसेवा देत रोगप्रतिबंधासाठी उल्लेखनीय योगदान दिल्याबद्दल त्यांना गौरविण्यात आले.
कार्यक्रमाला महापौर श्रीचंद तेजवानी, मनपा आयुक्त वर्षा लड्डा, स्थायी समिती सभापती अविनाश मार्डीकर, विरोधी पक्षनेते विलास इंगोले, अतिरिक्त आयुक्त शिल्पा नाईक तसेच आरोग्य विभागातील वरिष्ठ अधिकारी उपस्थित होते.
यावेळी महापौर श्रीचंद तेजवानी यांनी नागरिकांना आवाहन करताना सांगितले की, “डेंगूपासून बचावासाठी प्रत्येकाने घर आणि परिसर स्वच्छ ठेवावा, पाणी साचू देऊ नये आणि प्रतिबंधात्मक उपाययोजनांचे काटेकोर पालन करावे.”
आरोग्य विभागाच्या या उपक्रमाचे सर्व स्तरातून कौतुक होत असून, सन्मानित कर्मचाऱ्यांच्या कार्याला यामुळे नवी प्रेरणा आणि ऊर्जा मिळाल्याचे चित्र दिसून आले.
