नागपुरातील रामझुल्याखाली तरुणाचा मृतदेह आढळला; गणेशपेठ परिसरात खळबळ
नागपूर शहरातील गणेशपेठ परिसरातून एक खळबळजनक घटना समोर आली आहे. प्रसिद्ध पोदारेश्वर राम मंदिर आणि शीतला माता मंदिराजवळील जुन्या रामझुल्याखाली एका तरुणाचा मृतदेह आढळून आल्याने परिसरात एकच खळबळ उडाली.
मिळालेल्या माहितीनुसार, आज सकाळच्या सुमारास स्थानिक नागरिकांना रामझुल्याखाली एक व्यक्ती संशयास्पद अवस्थेत पडलेली दिसली. जवळ जाऊन पाहिले असता संबंधित तरुण मृत असल्याचे स्पष्ट झाले. त्यानंतर नागरिकांनी तात्काळ गणेशपेठ पोलिसांना माहिती दिली.
घटनास्थळी दाखल झालेल्या पोलिसांनी पंचनामा करून मृतदेह ताब्यात घेतला आणि उत्तरीय तपासणीसाठी शासकीय रुग्णालयात पाठवला. मृत तरुणाचे वय अंदाजे 30 वर्षे असल्याचे सांगितले जात असून अद्याप त्याची ओळख पटलेली नाही.
या मृत्यूचे नेमके कारण अद्याप स्पष्ट झालेले नाही. हा अपघात आहे, आत्महत्या आहे की इतर कोणते संशयास्पद कारण आहे, याचा तपास गणेशपेठ पोलीस करत आहेत.
या घटनेमुळे मंदिर परिसरात काही काळ भीती आणि तणावाचे वातावरण निर्माण झाले होते. पोलिस मृतकाची ओळख पटवण्याचा प्रयत्न करत असून पोस्टमॉर्टेम अहवालानंतर मृत्यूचे कारण स्पष्ट होण्याची शक्यता आहे.
दरम्यान, या प्रकरणातील पुढील तपास सुरू असून अधिक माहिती समोर येण्याची प्रतीक्षा आहे.
