इतवारी किराणा बाजारात चोरट्यांचा धुमाकूळ; आठपेक्षा अधिक दुकानांचे कुलूप तोडून लाखोंचा ऐवज लंपास
नागपूरच्या गजबजलेल्या इतवारी किराणा बाजारात सलग घडत असलेल्या चोरीच्या घटनांमुळे व्यापाऱ्यांमध्ये भीतीचे वातावरण निर्माण झाले आहे. बेखौफ चोरट्यांनी आठपेक्षा अधिक दुकानांचे कुलूप तोडून लाखो रुपयांचा माल आणि रोकड लंपास केल्याने व्यापाऱ्यांची झोप उडाली आहे.
मिळालेल्या माहितीनुसार, मागील काही दिवसांत मध्यरात्रीच्या सुमारास चोरट्यांनी बाजारातील अनेक दुकानांना लक्ष्य केले. दुकानांचे कुलूप तोडून आत प्रवेश करत त्यांनी लाखो रुपयांचा किराणा माल, मौल्यवान वस्तू आणि रोख रक्कम चोरून नेली.
विशेष म्हणजे, या सर्व घटना परिसरातील सीसीटीव्ही कॅमेऱ्यांमध्ये कैद झाल्या आहेत. फुटेजमध्ये चोरटे अत्यंत शिताफीने चेहरा झाकून फिरताना दिसत आहेत. तपासादरम्यान चोरीसाठी वापरण्यात आलेली वाहने बिननंबर प्लेटची असल्याचेही समोर आले आहे.
व्यापाऱ्यांच्या म्हणण्यानुसार, सलग चोरीच्या घटनांमुळे बाजारात मोठी अस्वस्थता निर्माण झाली आहे. रात्री दुकान बंद केल्यानंतर दुसऱ्या दिवशी दुकान सुरक्षित असेल की नाही, याची चिंता व्यापाऱ्यांना सतावत आहे.
या चोरीच्या घटना अत्यंत नियोजनबद्ध पद्धतीने घडत असल्याने, यामागे एखादी सराईत आणि व्यावसायिक टोळी सक्रिय असल्याचा संशय व्यक्त केला जात आहे.
घटनांची माहिती मिळताच क्राइम ब्रांच आणि लकडगंज पोलिसांनी घटनास्थळी धाव घेत तपास सुरू केला आहे. सीसीटीव्ही फुटेज, तांत्रिक माहिती आणि गुप्त सूत्रांच्या मदतीने आरोपींचा शोध घेतला जात असून विविध पथके कामाला लागली आहेत.
दरम्यान, व्यापाऱ्यांनी पोलिस प्रशासनाकडे बाजार परिसरात रात्रीची गस्त वाढवण्याची आणि सुरक्षा व्यवस्था अधिक मजबूत करण्याची मागणी केली आहे.
इतवारी किराणा बाजारातील या सलग चोरीच्या घटनांमुळे व्यापारी वर्गात प्रचंड चिंता निर्माण झाली असून, सीसीटीव्हीत कैद झालेले चोरटे नेमके कोण आहेत आणि त्यांना पोलिस केव्हा पकडणार, याकडे आता सर्वांचे लक्ष लागले आहे.
