४२ लाखांच्या धाडसी चोरीचा उलगडा; नागपूर क्राइम ब्रांचच्या जाळ्यात तीन आरोपी
नागपूर शहरातील एमआयडीसी परिसरात घडलेल्या तब्बल ४२ लाख रुपयांच्या धाडसी चोरीप्रकरणाचा उलगडा करण्यात क्राइम ब्रांचला मोठं यश मिळालं आहे. आयसी चौकातील मोनाली स्टील आणि मोनाली ज्वेलर्सचे कुलूप तोडून सोने-चांदीचे दागिने लंपास करणाऱ्या टोळीतील दोन आरोपींना घरफोडी विरोधी पथकाने अटक केली आहे, तर आणखी एक आरोपी एमआयडीसी पोलिसांच्या ताब्यात असल्याची माहिती समोर आली आहे.
मिळालेल्या माहितीनुसार, काही दिवसांपूर्वी आयसी चौकातील मोनाली स्टील आणि मोनाली ज्वेलर्स या दुकानांचे कुलूप तोडून अज्ञात चोरट्यांनी तब्बल ४२ लाख रुपयांचे सोने-चांदीचे दागिने आणि इतर मौल्यवान वस्तू चोरून नेल्या होत्या. या घटनेमुळे व्यापारी वर्गात भीती आणि संतापाचे वातावरण निर्माण झाले होते.
घटनेची गंभीरता लक्षात घेऊन नागपूर क्राइम ब्रांचच्या घरफोडी विरोधी पथकाने तपासाची चक्रे वेगाने फिरवली. परिसरातील सीसीटीव्ही फुटेज, तांत्रिक विश्लेषण आणि गुप्त माहितीच्या आधारे पोलिसांनी दोन संशयितांना ताब्यात घेतले. सखोल चौकशीनंतर त्यांनी चोरीची कबुली दिल्याने त्यांना अटक करण्यात आली.
दरम्यान, या प्रकरणातील आणखी एक आरोपी एमआयडीसी पोलिसांच्या ताब्यात असल्याचे समोर आले आहे. पोलिसांनी आरोपींकडून चोरीतील मुद्देमाल जप्त करण्याची प्रक्रिया सुरू केली असून, फरार असलेल्या आणखी एका आरोपीचा शोध युद्धपातळीवर सुरू आहे.
पोलिसांकडून या टोळीचा गुन्हेगारी इतिहास तपासला जात असून, आरोपींनी यापूर्वीही अशाच प्रकारच्या घरफोड्या किंवा चोरीच्या घटना केल्या आहेत का, याचा तपास सुरू आहे. तसेच या चोरीमागे मोठं रॅकेट कार्यरत आहे का, याचाही शोध घेतला जात आहे.
या प्रकरणातील जलद कारवाईमुळे व्यापाऱ्यांनी पोलिसांच्या कामगिरीचे स्वागत केले आहे. मात्र फरार आरोपीचा शोध आणि चोरीतील संपूर्ण मुद्देमाल जप्त करणे हे अजूनही पोलिसांसमोरचे मोठे आव्हान आहे.
४२ लाखांच्या या धाडसी चोरीचा उलगडा झाल्याने व्यापारी वर्गाला काहीसा दिलासा मिळाला असला, तरी पुढील तपासात आणखी कोणते धागेदोरे समोर येतात, याकडे सर्वांचं लक्ष लागलं आहे.
