पुसदमध्ये श्री ओंकारेश्वर शिवलिंगाची प्राणप्रतिष्ठा; वसंत विहार कॉलनीत भक्तिमय वातावरण
यवतमाळ जिल्ह्यातील पुसद शहरात आज अत्यंत धार्मिक आणि भक्तिमय वातावरणात श्री ओंकारेश्वर शिवलिंग प्राणप्रतिष्ठा सोहळा उत्साहात पार पडला. वसंत विहार कॉलनी, गायमुखनगर परिसरातील नव्याने उभारण्यात आलेल्या मंदिरात हा सोहळा मोठ्या श्रद्धा आणि भक्तिभावात संपन्न झाला.
पुसद शहरातील वसंत विहार कॉलनी आज सकाळपासूनच भक्तिमय वातावरणात न्हाऊन निघाली होती. नव्याने उभारण्यात आलेल्या मंदिरात श्री ओंकारेश्वर शिवलिंगाची विधिवत स्थापना आणि प्राणप्रतिष्ठा करण्यात आली. विशेष म्हणजे, हे शिवलिंग मध्यप्रदेशातील प्रसिद्ध ओंकारेश्वर ज्योतिर्लिंग क्षेत्रातील कळ्या पाषाणातून तयार करण्यात आले आहे. मंदिरात यासोबतच नंदीची आकर्षक मूर्तीही स्थापित करण्यात आली.
प्राणप्रतिष्ठा सोहळ्यानिमित्त सकाळी वेदघोष, मंत्रोच्चार, रुद्राभिषेक आणि विविध धार्मिक विधी पार पडले. वैदिक मंत्रांच्या निनादात आणि पूजाविधींच्या मंगलमय वातावरणात संपूर्ण परिसरात अध्यात्मिक ऊर्जा आणि भक्तिभावाची अनुभूती निर्माण झाली होती.
या धार्मिक सोहळ्यानंतर भाविकांसाठी महाप्रसादाचे आयोजन करण्यात आले. स्थानिक नागरिक, महिला, युवक आणि शिवभक्तांनी मोठ्या संख्येने उपस्थित राहून दर्शन घेतले आणि महाप्रसादाचा लाभ घेतला.
वसंत विहार कॉलनीतील समस्त शिवभक्त परिवाराच्या वतीने या भव्य आणि दिव्य सोहळ्याचे आयोजन करण्यात आले होते. भाविकांच्या उत्स्फूर्त प्रतिसादामुळे परिसरात दिवसभर भक्ती, श्रद्धा आणि उत्साहाचे वातावरण पाहायला मिळाले.
पुसद शहरात झालेल्या श्री ओंकारेश्वर शिवलिंग प्राणप्रतिष्ठा सोहळ्यामुळे परिसर भक्तिरसात रंगून गेला असून, वसंत विहार कॉलनीत अध्यात्मिक उत्साहाचे नवे पर्व सुरू झाल्याचे चित्र पाहायला मिळाले.
