अमरावतीत उष्णतेचा कहर; तापमान ४३ अंशांवर, नागरिकांचे जनजीवन विस्कळीत
अमरावती जिल्ह्यात उष्णतेची तीव्र लाट दिवसेंदिवस वाढताना दिसत आहे. एप्रिल महिन्याच्या सुरुवातीलाच तापमानाने तब्बल ४३ अंश सेल्सिअसचा टप्पा ओलांडला असून, नागरिकांचे जनजीवन अक्षरशः विस्कळीत झाले आहे. दुपारच्या वेळेत शहरातील रस्ते ओस पडत असून, उकाड्यामुळे लहान मुलांपासून ते वृद्धांपर्यंत सर्वांनाच त्रास सहन करावा लागत आहे.
सकाळपासूनच उन्हाचा चटका जाणवू लागतो आणि दुपारपर्यंत परिस्थिती अधिक गंभीर बनते. दुपारच्या वेळी गरम वाऱ्यांच्या झळा, म्हणजेच ‘लू’, वाहू लागल्याने नागरिक हैराण झाले आहेत. विशेषतः बांधकाम मजूर, रस्त्यावर काम करणारे कामगार, फेरीवाले आणि श्रमिक वर्गाला उन्हात काम करताना मोठ्या अडचणींचा सामना करावा लागत आहे.
उष्णतेपासून दिलासा मिळवण्यासाठी नागरिक मोठ्या प्रमाणावर थंड पेयांकडे वळताना दिसत आहेत. शहरातील विविध चौकांमध्ये उसाचा रस, निंबू सरबत, ताक, लस्सी आणि शीतपेयांच्या गाड्यांवर ग्राहकांची मोठी गर्दी पाहायला मिळत आहे. विशेषतः उसाच्या रसाच्या गाड्यांवर दिवसभर रांगा लागत असून, नागरिक उकाड्यापासून बचाव करण्यासाठी विविध उपाय करत आहेत.
दरम्यान, आरोग्य तज्ज्ञांनी नागरिकांना विशेष सतर्क राहण्याचा इशारा दिला आहे. वाढत्या तापमानामुळे उष्माघाताचा धोका वाढला असून, दुपारी १२ ते ४ या वेळेत अत्यावश्यक कामाशिवाय बाहेर पडू नये, असा सल्ला देण्यात आला आहे. तसेच भरपूर पाणी पिणे, डोक्यावर टोपी, रुमाल किंवा कापड वापरणे, हलके व सैल कपडे घालणे आणि हलका आहार घेणे आवश्यक असल्याचे डॉक्टरांनी सांगितले आहे.
उष्णतेच्या या तीव्र लाटेमुळे प्रशासन आणि आरोग्य यंत्रणाही सतर्क झाली आहे. जिल्ह्यातील रुग्णालयांमध्ये उष्णतेमुळे त्रस्त रुग्णांची संख्या वाढत असल्याची माहिती समोर येत आहे. पुढील काही दिवस तरी अमरावतीत उकाड्याची ही तीव्रता कायम राहण्याची शक्यता हवामान तज्ज्ञांनी व्यक्त केली आहे.
