ओडिशाच्या कोरापुटमध्ये मध्यरात्री भूकंपाचे धक्के; 4.4 तीव्रतेने नागरिकांमध्ये घबराट
कोरापुट जिल्ह्यात शनिवारी रात्री उशिरा भूकंपाचे धक्के जाणवल्याने नागरिकांमध्ये एकच खळबळ उडाली. रात्री सुमारे ११:३० वाजण्याच्या सुमारास झालेल्या या भूकंपाची तीव्रता रिश्टर स्केलवर ४.४ इतकी नोंदवण्यात आली.
राष्ट्रीय भूकंपशास्त्र केंद्र (NCS) च्या माहितीनुसार, भूकंपाचा केंद्रबिंदू जयपूर परिसरात होता. हा भूकंप जमिनीखाली अवघ्या ५ किलोमीटर खोलीवर झाल्यामुळे त्याचे धक्के अधिक तीव्रतेने जाणवले.
या घटनेचे सीसीटीव्ही फुटेज समोर आले असून, त्यामध्ये काही सेकंदांसाठी कॅमेरे हलताना स्पष्ट दिसत आहेत. भूकंपाचे धक्के जाणवताच लोक घाबरून घराबाहेर धावताना दिसले, ज्यामुळे काही काळासाठी परिसरात भीतीचे वातावरण निर्माण झाले.
कोरापुटसह जयपूर, लामतापुट, सुनाबेदा, बोरिगुमा, सेमिलिगुडा, नंदपूर, पोट्टांगी आणि दमनजोडी या भागांमध्येही भूकंपाचे धक्के जाणवले. जरी हे धक्के काही सेकंदच टिकले, तरी अचानक झालेल्या हालचालींमुळे नागरिक सतर्क झाले.
प्राथमिक माहितीनुसार, या भूकंपामुळे कोणतीही मोठी जीवित किंवा वित्तहानी झालेली नाही. अधिकाऱ्यांनी दिलेल्या माहितीनुसार, हा सौम्य प्रकारातील भूकंप असून अशा भूकंपांमध्ये सहसा किरकोळ हादरे जाणवतात.
सध्या प्रशासन परिस्थितीवर लक्ष ठेवून असून, नागरिकांना घाबरून न जाता सतर्क राहण्याचे आवाहन करण्यात आले आहे.
