अमरावती महापालिकेचा २०२६-२७ चा अर्थसंकल्प उद्या मंजुरीसाठी; विशेष सभेकडे सर्वांचे लक्ष
अमरावती (प्रतिनिधी):
अमरावती महानगरपालिकेच्या आगामी आर्थिक वर्ष २०२६-२७ च्या अर्थसंकल्पावर निर्णायक टप्पा गाठला असून, हा अर्थसंकल्प अंतिम मंजुरीसाठी सोमवार, ३० मार्च रोजी होणाऱ्या विशेष सर्वसाधारण सभेत सादर करण्यात येणार आहे. त्यामुळे शहराच्या विकासाच्या दृष्टीने महत्त्वपूर्ण मानल्या जाणाऱ्या या बैठकीकडे सर्वांचे लक्ष लागले आहे.
महाराष्ट्र महानगरपालिका अधिनियम १९४९ अंतर्गत, अनुसूची प्रकरण २ मधील नियम क्रमांक १ (ड) नुसार ही विशेष सभा सकाळी ११ वाजता “विश्वरत्न डॉ. बाबासाहेब आंबेडकर सभागृह” येथे आयोजित करण्यात आली आहे. या सभेत विषय क्रमांक १४ अंतर्गत सन २०२५-२६ च्या सुधारित अंदाजपत्रकासह सन २०२६-२७ साठीचे मुळ अंदाजपत्रक मंजुरीसाठी मांडले जाणार आहे.
महानगरपालिका आयुक्तांनी सादर केलेल्या अर्थसंकल्पावर स्थायी समितीने कलम ९६ अन्वये सविस्तर चर्चा करून आवश्यक फेरबदल केले आहेत. स्थायी समितीचे सभापती अविनाश मार्डीकर यांनी बैठकीत अर्थसंकल्पातील प्रत्येक घटकाचा आढावा घेत नागरिकाभिमुख आणि परिणामकारक बजेट तयार करण्यावर भर दिला.
बैठकीदरम्यान नगरसेवक आणि अधिकाऱ्यांनी शहरातील विविध गरजांवर चर्चा करत निधीच्या प्राधान्यक्रमावर विचारमंथन केले. विशेषतः स्वच्छता व्यवस्था, रस्ते व पायाभूत सुविधा, महानगरपालिका शाळा, आरोग्य केंद्रे आणि सार्वजनिक वाहतूक या क्षेत्रांसाठी निधी वाढविण्याच्या सूचना मांडण्यात आल्या.
स्थायी समितीच्या सूचनांनुसार अर्थसंकल्पात आवश्यक सुधारणा करण्यात येत असून, तो अंतिम मंजुरीसाठी सभेत मांडला जाणार आहे. या प्रक्रियेमुळे अर्थसंकल्प अधिक पारदर्शक, कार्यक्षम आणि नागरिकाभिमुख होईल, असा विश्वास व्यक्त करण्यात येत आहे.
दरम्यान, २०२६-२७ च्या अर्थसंकल्पात शहर विकास, पायाभूत सुविधा बळकटीकरण, आरोग्य आणि शिक्षण क्षेत्रातील सुधारणा यांसह अनेक महत्त्वपूर्ण प्रकल्पांचा समावेश करण्यात आला आहे.
अमरावती शहराच्या भविष्यासाठी महत्त्वाचा ठरणारा हा अर्थसंकल्प उद्याच्या सभेत मंजूर होणार का आणि त्यातून नागरिकांना नेमका किती फायदा होणार, याकडे आता सर्वांचे लक्ष लागले आहे.
