ग्वालियरमध्ये भीषण अपघात: स्कॉर्पिओ-ऑटो धडकेत एकाच कुटुंबातील ५ जणांचा मृत्यू
ग्वालियर – मध्य प्रदेशातील ग्वालियर शहरातून एक अत्यंत धक्कादायक अपघाताची घटना समोर आली आहे. स्कॉर्पिओ आणि ऑटो रिक्षामध्ये झालेल्या भीषण धडकेत एकाच कुटुंबातील पाच जणांचा दुर्दैवी मृत्यू झाला आहे.
मिळालेल्या माहितीनुसार, मृतांमध्ये दोन महिला आणि तीन पुरुषांचा समावेश आहे. हे सर्वजण शीतला देवीच्या दर्शनासाठी गेले होते. दर्शन करून परत येत असताना त्यांच्या ऑटोला भरधाव स्कॉर्पिओने जोरदार धडक दिली. धडक इतकी भीषण होती की ऑटोचा अक्षरशः चक्काचूर झाला.
या अपघातावेळी ऑटोमध्ये चालकासह एकूण ९ जण प्रवास करत होते. त्यापैकी ५ जणांचा जागीच मृत्यू झाला, तर उर्वरित ४ जण गंभीर जखमी झाले आहेत. जखमींमध्ये एक महिला, एक पुरुष आणि दोन लहान मुलांचा समावेश असून त्यांच्यावर रुग्णालयात उपचार सुरू आहेत.
ही दुर्घटना ग्वालियर जिल्ह्यातील थाटीपूर पोलीस ठाण्याच्या हद्दीत घडली. अपघातानंतर स्थानिक नागरिक आणि पोलिसांनी तत्काळ मदतकार्य सुरू करत जखमींना रुग्णालयात हलवले. मृतदेह शवविच्छेदनासाठी पाठवण्यात आले आहेत.
दरम्यान, अपघातानंतर स्कॉर्पिओ चालक घटनास्थळावरून फरार झाला असून पोलिसांनी त्याच्या शोधासाठी नाकाबंदी केली आहे. अज्ञात चालकाविरोधात गुन्हा दाखल करण्यात आला असून या प्रकरणाचा पुढील तपास सुरू आहे.
