कर्नाटक काँग्रेस आमदार के. सी. वीरेंद्र ‘पपी’ यांना ED कडून अटक; 12 कोटी रोख आणि 6 कोटींचं सोनं जप्त
नवी दिल्ली: अंमलबजावणी संचालनालयाने (ED) शनिवारी कर्नाटकातील काँग्रेस आमदार के. सी. वीरेंद्र ‘पपी’ यांना एका मोठ्या बेकायदेशीर ऑनलाइन आणि ऑफलाइन बेटिंग रॅकेट प्रकरणी अटक केली आहे. दोन दिवसांच्या देशव्यापी छापेमारीनंतर ही कारवाई करण्यात आली असून, यामध्ये 12 कोटी रुपये रोख, 6 कोटी रुपयांचे सोन्याचे दागिने, आणि 10 किलो चांदीचे दागिने जप्त करण्यात आले आहेत.
मोठी कारवाई आणि आंतरराष्ट्रीय कनेक्शन
ईडीने 22 आणि 23 ऑगस्ट रोजी पाच राज्यांतील 31 ठिकाणांवर छापे टाकले. यामध्ये सिक्कीम, कर्नाटक, राजस्थान, महाराष्ट्र आणि गोवा यांचा समावेश आहे. गोव्यातील पाच मोठ्या कॅसिनोंवरही छापेमारी करण्यात आली. यामध्ये ‘पपीज कॅसिनो गोल्ड’, ‘ओशन रिव्हर्स कॅसिनो’, ‘पपीज कॅसिनो प्राइड’, ‘ओशन 7 कॅसिनो’ आणि ‘बिग डॅडी कॅसिनो’ यांचा समावेश आहे.
ईडीच्या तपासात समोर आलं आहे की, आमदार वीरेंद्र हे ‘किंग 567’ आणि ‘राजा 567’ यांसारख्या अनेक बेटिंग वेबसाइट्स चालवत होते. तसेच, त्यांचा भाऊ के. सी. थिप्पेस्वामी दुबईमधून कॉल सेंटर आणि गेमिंग ऑपरेशन्स चालवत होता. या माध्यमातून आंतरराष्ट्रीय स्तरावर मोठे बेटिंग नेटवर्क कार्यरत असल्याचा खुलासा झाला आहे.
जप्त केलेल्या संपत्तीचा तपशील
- रोख रक्कम: ₹ 12 कोटी (यामध्ये ₹ 1 कोटी परकीय चलन)
- सोन्याचे दागिने: ₹ 6 कोटी किमतीचे
- चांदीचे दागिने: 10 किलो
- वाहनं: सारख्याच VIP नंबर प्लेट असलेल्या तीन आलिशान गाड्या
- बँक खाती: 17 बँक खाती गोठवली
- लॉकर: 2 बँक लॉकर गोठवले
याव्यतिरिक्त, एमजीएम, बेलाजियो, मेट्रोपॉलिटन, मरीना आणि कॅसिनो ज्वेल यांसारख्या आंतरराष्ट्रीय कॅसिनोंची मेंबरशिप कार्ड्स आणि अनेक लक्झरी हॉटेल्सचे मेंबरशिप कार्ड्सही जप्त करण्यात आले आहेत.
कोर्टात हजर
50 वर्षीय आमदार वीरेंद्र यांना दंडाधिकारी न्यायालयात हजर करण्यात आले आहे. न्यायालयाने त्यांना बेंगळुरू न्यायालयात हजर करण्यासाठी ट्रान्झिट रिमांड मंजूर केला आहे. या प्रकरणाच्या पुढील तपासासाठी ईडीने त्यांची कोठडी मागितली आहे.
