अमरावती : अमरावती शहरातील अत्यंत वर्दळीचा आणि वाहतूकदृष्ट्या महत्त्वाचा मालवीय चौक गेल्या अनेक महिन्यांपासून अतिक्रमणाच्या विळख्यात अडकला होता. सेकंड हँड दुचाकी विक्रेते आणि फुटपाथवरील अनधिकृत दुकानदारांमुळे नागरिकांना त्रास सहन करावा लागत होता. अखेर, या अडचणीवर तोडगा काढण्यासाठी वाहतूक पोलिस निरीक्षक रीता उईके यांच्या नेतृत्वाखाली आणि अतिक्रमण विभागप्रमुख योगेश कोल्हे यांच्या पथकाने संयुक्त कारवाई केली.
वाहतूक पोलिसांनी सर्वप्रथम रस्त्यावर दुचाकी विक्री करणाऱ्या दलालांना तंबी दिली आणि वाहतुकीस अडथळा ठरणाऱ्या दुचाकींवर चालान फाडले. यानंतर अतिक्रमण विभागाचं पथक घटनास्थळी दाखल झालं आणि कृषी उत्पन्न बाजार समितीच्या भिंतीलगत उभारलेल्या अनधिकृत दुकांनांवर कारवाई केली गेली.
या कारवाईत:
हातगाड्या, पानटपऱ्या, स्टॉल्स जप्त
२ ट्रक भरून अतिक्रमित साहित्य अतिक्रमण गोदामात पाठवले
रस्त्याच्या कडेला लावलेल्या मालवाहू वाहनांवर चालान
ही कारवाई सिटी कोतवाली पोलिसांच्या उपस्थितीत सुमारे १ तास चालली. यापूर्वीही या परिसरात अशी कारवाई झाली होती, परंतु स्थानिक नेतागिरीमुळे अतिक्रमण पुन्हा सुरू होतं. यावेळी मात्र प्रशासनाचा कडक पवित्रा पाहायला मिळाला.
वाहतूक निरीक्षक रीता उईके यांनी सांगितले की, “वाहतूक सुरळीत ठेवण्यासाठी आणि पादचाऱ्यांचा हक्काचा मार्ग मोकळा करण्यासाठी अशी कारवाई सातत्याने केली जाईल.” तर अतिक्रमण विभाग प्रमुख योगेश कोल्हे यांनी ठाम सांगितले की, “अनधिकृत दुकानदारांना यापुढे कोणतीही मुभा दिली जाणार नाही.”
