नागपुरात घरात घुसून तरुणीवर हल्ला; लहान बहिणीचा विनयभंग केल्याचा आरोप
पाण्याच्या बहाण्याने घरात प्रवेश; विरोध केल्याने लोखंडी पाइप आणि काठ्यांनी मारहाण, तरुणी गंभीर जखमी
नागपूर : शहरातील कळमना पोलीस ठाण्याच्या हद्दीत घरात घुसून तरुणीवर प्राणघातक हल्ला केल्याची आणि तिच्या लहान बहिणीचा विनयभंग केल्याचा गंभीर प्रकार समोर आला आहे. पाण्याचा बहाणा करून घरात प्रवेश करणाऱ्या आरोपींनी दोन्ही बहिणींशी गैरवर्तन केल्याचा आरोप असून, विरोध केल्याने तरुणीला लोखंडी पाइप आणि काठ्यांनी मारहाण करण्यात आली. या घटनेमुळे परिसरात खळबळ उडाली आहे.
मिळालेल्या माहितीनुसार, घटना घडली त्यावेळी दोन्ही बहिणी घरी एकट्याच होत्या. याच संधीचा फायदा घेत काही जणांनी पाणी पिण्याच्या बहाण्याने त्यांच्या घरात जबरदस्तीने प्रवेश केला. यावेळी तरुणीने आरोपींना स्वतःच्या घरी जाऊन पाणी पिण्यास सांगितले. मात्र, याचा राग आल्याने आरोपींनी तिचा हात पकडल्याचा आरोप आहे.
या प्रकारानंतर तरुणी आरोपींविरोधात तक्रार करण्यासाठी त्यांच्या घरी गेली. त्यावेळी आरोपींनी तिच्या लहान बहिणीसोबत जबरदस्ती करण्याचा प्रयत्न केल्याचे तक्रारीत नमूद असल्याची माहिती आहे. याला विरोध केल्याने आरोपींनी तरुणीवर लोखंडी पाइप आणि काठ्यांनी हल्ला केला. या मारहाणीत ती गंभीर जखमी झाली.
या प्रकरणी पीडितेने कळमना पोलीस ठाण्यात तक्रार दिली आहे. पुढील तपासाबाबत आणि आरोपींवरील कारवाईबाबतची माहिती उपलब्ध झालेली नाही.
